Mataio 7 - Setswana 1970

Go atlhola

¹ “Lo se ka lwa atlhola gore lo se atlholwe;

² gonne katlholo e lo ka atlholang ka yona, lo tla atlholwa ka yona, le selekanyo se lo ka lekanyang ka sona, lo tla lekanyediwa ka sona.

³ O lebelang phatsana e e mo leitlhong la morwa-rraago, mme o sa lemoge kota e e mo leitlhong la gago?

⁴ Gape o ka raya morwa-rraago jang wa re: ‘Nte ke ntshe phatsana mo leitlhong la gago,’ etswe ò sa bone kota e e mo leitlhong la gago?

⁵ Moitimokanyi ke wena! Ntsha kota mo leitlhong la gago pele; ke gona ò tla bonang sentle go ntsha phatsana mo leitlhong la morwa-rraago.

⁶ “Lo se ka lwa naya dintšwa se se itshepileng; le gona lo se ka lwa latlhela ditalama tsa lona fa pele ga dikolobe, e se re gongwe tsa di gataka ka ditlhako tsa tsona, tsa ba tsa retologa, tsa lo gagoganya.

Kopang, batlang, konyakonyang

⁷ “Kopang, mme lo tla newa; batlang, mme lo tla bona; konyakonyang, mme lo tla bulelwa.

⁸ Gonne mongwe le mongwe yo o kopang, o a amogela; le yo o batlang, o a bona; le yo o konyakonyang, o tla bulelwa.

⁹ A kampo go na le motho mo go lona yo e ka reng fa morwawe a mo kopa senkgwe, a mo naya lentswe?

¹⁰ Gongwe fa a kopa tlhapi, a a ka mo naya noga?

¹¹ Jaanong, fa lona, ba lo leng bosula, lo itse go naya bana ba lona dineo tse di molemo, bogolo jang Rraalona yo o kwa magodimong o tla naya ba ba mo kopang tse di siameng!

¹² “Jaanong tsotlhe tse lo ratang batho ba di lo direla, lo ba direle tsona; gonne molao o a re jalo le baporofeti.

Kgoro e e pitlaganyeng

¹³ “Tsenang ka kgoro e e pitlaganyeng; gonne kgoro e atlhame, le tsela e kgolo e e yang kwa tatlhegong, mme ba ba tsenang ka yona ba bantsi.

¹⁴ Mme kgoro e pitlaganye, le tsela e tshesane e e yang botshelong, mme ba ba e bonang ga ba bantsi.

Ditlhare le maungo

¹⁵ “Itiseng mo baporofeting ba e seng bone, ba ba tlang go lona ba apere diaparo tsa dinku, mme mo teng e le diphiri tse di garolang.

¹⁶ Lo tla ba itse ka maungo a bone. A go a tle go fulwe leungo la moweine mo mitlweng, gongwe difeie mo mesitlwaneng?

¹⁷ Ka moo, setlhare sengwe le sengwe se se siameng se ungwa maungo a a monate; mme setlhare se se sa siamang se ungwa maungo a a botlhoko.

¹⁸ Setlhare se se siameng ga se ka ke sa ungwa maungo a a botlhoko, le setlhare se se sa siamang ga se ka ke sa ungwa maungo a a monate.

¹⁹ Setlhare sengwe le sengwe se se sa ungweng leungo le le monate se a rengwa, se latlhelwe mo molelong.

²⁰ Ka moo he, lo tla ba itse ka maungo a bone.

Ga ke lo itse

²¹ “Ga se mongwe le mongwe yo o nthayang a re: ‘Morena, Morena!’ yo o tla tsenang mo pusong ya magodimo; go tla tsena fela yo o dirang thato ya ga Rre yo o kwa magodimong.

²² Ba bantsi ba tla nthaya ka letsatsi leo ba re: ‘Morena, Morena, a ga re a ka ra rera Lefoko la Modimo ka leina la gago, ra ba ra leleka medemone ka leina la gago, ra ba ra dira ditiro tse dikgolo ka leina la gago?’

²³ Foo ke tla ba raya ke re: ‘Ga ke ise nke ke lo itse; tlogang fa go nna, lona badiratshiamololo!’

Baagi ba babedi

²⁴ “Jaanong mongwe le mongwe yo o utlwang mafoko ao a me, a ba a a dirisa, o tla tshwana le monna yo o tlhoko, yo o agileng ntlo ya gagwe mo lefikeng;

²⁵ mme pula ya fologa, le merwalela ya tla, le diphefo tsa foka, tsa itaya ntlo eo; mme ya se ka ya wa; gonne e ne e theilwe mo lefikeng.

²⁶ “Mme mongwe le mongwe yo o utlwang mafoko ao a me, mme a sa a dirise, o tla tshwana le monna yo o lesilo, yo o agileng ntlo ya gagwe mo mošaweng;

²⁷ mme pula ya fologa, le merwalela ya tla, le diphefo tsa foka, tsa itaya ntlo eo, ya ba ya wa; mme go wa ga yona ga nna gogolo.”

Thata ya ga Jesu

²⁸ Jaanong ya re Jesu a sena go fetsa mafoko ao, batho ba welwa ke letshogo le legolo ka ntlha ya thuto ya gagwe;

²⁹ gonne o ne a ba ruta jaaka yo o nang le thata, e seng jaaka Baitsedikwalo ba bone.