Mataio 4 - Setswana 1970

Jesu o a raelwa

¹ Ya baa gona Jesu a gogelwang ke Mowa kwa sekakeng gore a raelwe ke Diabolo.

² E rile a sena go itima dijo malatsi a le 40 le masigo a le 40, a tshwarwa ke tlala.

³ Jaanong moraedi a tla, a mo raya a re: “Fa o le Morwa Modimo, bua gore majwe a, a fetoge dinkgwe.”

⁴ Ene a fetola a re: “Go kwadilwe ga twe: ‘Motho ga a nke a phela ka senkgwe fela; o phela ka lefoko lengwe le lengwe le le tswang mo molomong wa Modimo.’ ”

⁵ Jaanong Diabolo a mo isa kwa motseng o o boitshepo, a mmaya mo setlhoeng sa Tempele,

⁶ a mo raya a re: “Fa ò le Morwa Modimo, itatlhele kwa tlase; gonne go kwadilwe ga twe: “ ‘O tla laela baengele ba gagwe ka ga gago; ba tla go kuka ka diatla, e se re gongwe dinao tsa gago tsa kgopiwa ke lentswe.’ ”

⁷ Jesu a mo fetola a re: “E bile go kwadilwe ga twe: ‘O se ka wa leka Morena, Modimo wa gago!’ ”

⁸ Gape, Diabolo a mo isa kwa thabeng e e goletseng kwa godimo thata, a mmontsha magosi otlhe a lefatshe le bontle jwa ona,

⁹ a mo raya a re: “Tsotlhe tse ke tla di go naya, fa o ka wela fa fatshe, wa nkobamela.”

¹⁰ Jesu a mo fetola a re: “Ntlogela, Satane! Gonne go kwadilwe ga twe: ‘O tshwanetse go obamela Morena, Modimo wa gago le go direla ene a le esi fela.’ ”

¹¹ Ke fa Diabolo a mo tlogela; mme baengele ba tla, ba mo direla.

Jesu o simolola tiro

¹² E rile a utlwa gore Johane o golegilwe, a ngwegela kwa Galelea.

¹³ A huduga kwa Nasaretha, a ya go nna kwa Kaperenaume yo o fa letsheng mo nageng ya Sebulone le Nafetale,

¹⁴ gore go dirafale se se builweng ke moporofeti Jesaya a re:

¹⁵ “Lefatshe la Sebulone le lefatshe la Nafetale, ntlheng ya letsha, moseja wa Joretane, Galelea wa Baditšhaba,

¹⁶ morafe o o ntseng mo lefifing o bonye lesedi le legolo; ba ba dutseng mo lefatsheng la loso le mo moriting wa loso, lesedi le ba tlhabetse.”

¹⁷ Go tloga foo Jesu a simolola go rera a re: “Tlhabologang; gonne puso ya magodimo e atametse!”

Barutwa ba ntlha

¹⁸ Ya re a tsamaya fa letsheng la Galelea, a bona bana ba motho ba le babedi, e bong Simone yo o bidiwang Petoro le Andrea morwa-rraagwe, ba digela letloa mo letsheng; gonne e ne e le batshwari ba ditlhapi.

¹⁹ A ba raya a re: “Ntshalang morago, mme ke tla lo dira batshwari ba batho.”

²⁰ Jaanong ba akofa ba tlogela matloa, ba mo sala morago.

²¹ Ya re a fetela pele go tswa foo, a bona bana ba motho ba bangwe ba le babedi, e bong Jakobo, morwa Sebeteo, le Johane monnawe, ba na le Sebeteo rraabo mo mokorong, ba baakanya matloa a bone; a ba bitsa.

²² Ba akofa ba tlogela mokoro le rraabo, ba mo sala morago.

²³ Jaanong Jesu a tsamaya le Galelea yotlhe, a ntse a ruta mo disenagogeng tsa bone a rera Efangele ya puso, a fodisa malwetse otlhe le makoa otlhe mo bathong.

²⁴ Tumo ya gagwe ya tswela kwa Siria yotlhe. Batho ba isa go ene botlhe ba ba lwalang, ba ba tshwerweng ke malwetse a mefutafuta le matlhoko, le ba ba tsenyweng ke medemone, le ba ba karalalang, le ba ba suleng mefama, a ba fodisa.

²⁵ Bontsintsi jwa mo latela, bo tswa kwa Galelea le Dekapoli le Jerusalema le Jutea le kwa moseja ga Joretane.