Mataio 27 - Setswana 1970

Jesu o isiwa kwa go Pilato

¹ E rile boo sa, baperesiti ba bagolo botlhe le bagolo ba morafe ba utlwana ka ga Jesu gore ba mmolae.

² Ya re ba sena go mo golega, ba eta ba mo goga, ba mo neela Pontio Pilato, molaodi.

Jutase o a ipolaya

³ Jaanong Jutase yo o mo tshwarisitseng, ya re a bona gore Jesu o atlhotswe, a ikwatlhaya, a busetsa diselefera tse di 30 kwa baperesiting ba bagolo le bagolong ba morafe

⁴ a re: “Ke leofile, ka ke tshwarisitse motho yo o se nang molato.” Bona ba re: “Ga re na sepe le tseo. A go bone wena!”

⁵ Ke fa a latlhela diselefera mo Tempeleng, a tsamaya a ya a ipeta.

⁶ Baperesiti ba bagolo ba tsaya diselefera tseo ba re: “Ga go a letlelelwa go di tsenya mo letloleng la dikabelo, ka e le tuelo ya madi.”

⁷ Ya re ba sena go utlwana, ba reka naga ya mmopi wa dipitsa ka tsona go fitlha baeng mo go yona.

⁸ Ke ka moo naga eo e bidiwang “Naga ya Madi,” go fitlhelela kajeno.

⁹ Ya baa gona go dirafalang se se builweng ke moporofeti Jeremia, a re: “Ka tsaya diselefera tse di 30 mo Baiseraeleng, e le tlhwatlhwa ya yo o kailweng, yo batho ba neng ba mo kaya jalo.

¹⁰ Ba di ntshetsa naga ya mmopi wa dipitsa, jaaka Morena a ntaetse.”

Jesu fa pele ga Pilato

¹¹ Jaanong Jesu a emisiwa fa pele ga molaodi. Molaodi a mmotsa a re: “A ke wena kgosi ya Bajuta?” Jesu a re: “O bolela jalo.”

¹² Mme ya re a bewa molato ke baperesiti ba bagolo le bagolo ba morafe, a se ka a fetola sepe.

¹³ Ke fa Pilato a mo raya a re: “A ga o utlwe tse dintsi tse ba di supang ka ga gago?”

¹⁴ Mme a se ka a araba lefoko lepe la gagwe, mo molaodi o bileng a gakgamala thata.

Jesu o a atlholwa go bolawa

¹⁵ Molaodi o ne a tlwaetse gore ka moletlo a gololele batho mogolegwi yo ba mmatlang.

¹⁶ Ya re ka sebaka seo ba bo ba na le mogolegwi mongwe yo o tumileng ka bosula, yo o bidiwang Barabase.

¹⁷ Jaanong ya re ba phuthegile, Pilato a ba raya a re: “Lo rata ka lo gololela mang, a Barabase gongwe Jesu yo o bidiwang Keresete?”

¹⁸ A re jalo, gonne o ne a itse gore ba mo neetse tshekong ka lefufa.

¹⁹ Ya re a ntse mo sedulong sa katlholo, mosadi wa gagwe a roma go ene a re: “O se ka wa nna le sepe le mosiami yoo; gonne ke bogile tse dintsi bosigong jono mo torong ka ntlha ya gagwe.”

²⁰ Mme baperesiti ba bagolo le bagolo ba morafe ba tlhotlheletsa batho gore ba kope Barabase, mme ba bolae Jesu.

²¹ Molaodi a ba botsa a re: “Lo rata ka lo gololela ofe mo go ba babedi ba?” Ba re: “Barabase!”

²² Pilato a ba a ba botsa a re: “Mme jaanong ke tla dirang ka Jesu yo o bidiwang Keresete?” Botlhe ba re: “A a bapolelwe sefapaanong!”

²³ Ene a re: “Kana o dirile bosula bofe?” Mme ba goa thata thata ba re: “A a bapolelwe sefapaanong!”

²⁴ Ya re Pilato a bona gore o a palelwa, mme bogolo go bile go tsoga pheretlhego, a tsaya metsi, a tlhapa diatla fa pele ga batho a re: “Ga ke na molato mo mading a mosiami yo; a go bone lona.”

²⁵ Morafe otlhe wa araba wa re: “Madi a gagwe a a wele rona le bana ba rona!”

²⁶ Ke fa a ba gololela Barabase. Ya re a sena go seola Jesu, a mo ba neela gore a bapolwe.

Jesu o sotlwa ke batlhabani

²⁷ Jaanong batlhabani ba molaodi ba tsenya Jesu mo kagong ya molaodi, ba phuthela mophato otlhe kwa go ene,

²⁸ ba mo apola diaparo, ba mo apesa kobo e khibidu;

²⁹ ba loga kgare ya mitlwa, ba e mo rwesa mo tlhogong, ba mo tshwarisa lotlhaka ka letsogo le le jang, ba khubamela fa pele ga gagwe, ba mo sotla ba re: “Dumela, Kgosi ya Bajuta!”

³⁰ Ba mo kgwela mathe, ba tsaya lotlhaka, ba mo rutha mo tlhogong.

³¹ Ya re ba sena go mo sotla, ba mo apola kobo, ba mo apesa diaparo tsa gagwe, ba tsamaya ba mo goga gore ba mmapolele sefapaanong.

Jesu o a bapolwa

³² Ya re ba tswela kwa ntle, ba bona motho mongwe wa Kirene yo leina la gagwe e leng Simone; ba mo pateletsa gore a mo sikarele sefapaano.

³³ Ya re ba sena go fitlha felong fa go bidiwang Golegotha, ke go re, “Felo ga logata,”

³⁴ ba mo naya weine e tlhakantswe le santlhokwe, gore a nwe; mme ya re a sena go e leka, a gana go e nwa.

³⁵ Ya re ba sena go mmapola, ba kgaogana diaparo tsa gagwe ka go di tlhamela tengwa, e le gore go dirafale se se builweng ke moporofeti a re: “Ba kgaoganye diaparo tsa me; mme kobo ya me ba e tlhamela tengwa.”

³⁶ Jaanong ba nna fatshe foo, ba mo lebelela.

³⁷ Fa godimo ga tlhogo ya gagwe ba pega sekwalo sa molato wa gagwe se re: “YO KE JESU KGOSI YA BAJUTA.”

³⁸ Ga bapolwa nae dinokwane tse pedi, sengwe ka fa letsogong le le jang, se sengwe ka fa go la molema.

³⁹ Jaanong ba ba fetang ba mo kgala, ba thukhutha ditlhogo

⁴⁰ ba re: “Wena yo o rileng o ka senya Tempele, wa ba wa e tsosa ka malatsi a le mararo, ipholose! Fa o le Morwa Modimo, fologa mo sefapaanong!”

⁴¹ Baperesiti ba bagolo le bone, mmogo le Baitsedikwalo le bagolo ba morafe, ba mo sotla fela jalo ba re:

⁴² “O ne a thusa ba bangwe, mme ene o palelwa ke go ithusa. Fa e le ene Kgosi ya Iseraele, a a fologe jaanong mo sefapaanong, re tle re dumele mo go ene.

⁴³ O ikantse Modimo; a o mo golole jaanong, fa o mo rata; gonne o rile: ‘Ke Morwa Modimo.’ ”

⁴⁴ Dinokwane tse di bapotsweng nae le tsone tsa mo kgoba fela jalo.

⁴⁵ Go tloga ka nako ya motshegare ga nna lefifi mo lefatsheng lotlhe go ya nakong ya boraro ya thapama.

⁴⁶ Ya re e ka ne e le ka nako ya boraro thapama, Jesu a goa ka lentswe le legolo a re: “Eli, Eli, lama sabagathani?” Ke go re: “Modimo wa me, Modimo wa me, o ntlogeletseng?”

⁴⁷ Bangwe ba bone ba ba emeng teng, ya re ba utlwa, ba re: “O bitsa Elia.”

⁴⁸ Mongwe wa bone a akofa, a siana, a tsaya ngami, a e ina mo motatseng, a e tlhomela mo lotlhakeng, a mo nosa.

⁴⁹ Ba bangwe ba re: “Lesa, re boneng gore a Elia o tla tla, a mo golola.”

⁵⁰ Mme Jesu a goa gape ka lentswe le legolo, a ba a ntsha mowa.

⁵¹ Foo lesire la Tempele la gagoga ka bogare, go simolola kwa godimo go ya kwa tlase; lefatshe la roroma, mafika a fatoga;

⁵² diphupu tsa bulega, mebele e mentsi ya baitshepi ba ba neng ba robetse ya tsosiwa,

⁵³ ba tswa diphupung morago ga tsogo ya gagwe, ba tsena mo motseng o o boitshepo, ba bonwa ke ba le bantsi.

⁵⁴ Mme molaodi-wa-lekgolo le ba ba lebeletseng Jesu nae, ya re ba bona thoromo ya lefatshe le tse di dirafalang, ba boifa thata ba re: “Ammaaruri, yo e ne e le Morwa Modimo.”

⁵⁵ Basadi ba bantsi ba bo ba le teng foo, ba lebile ba le kwa kgakala, e le ba ba setseng Jesu morago go tswa Galelea go mo direla.

⁵⁶ Mo go bone ga bo go le Maria Magtalena, le Maria, mma Jakobo le Jose, le mma bomorwa Sebeteo.

Phitlho ya ga Jesu

⁵⁷ E rile go le maitsiboa, ga tla motho mongwe wa mohumi wa Arimathea, yo leina la gagwe e leng Josefa, yo le ene e neng e le morutwa wa ga Jesu.

⁵⁸ Yo a ya kwa go Pilato, a kopa serepa sa ga Jesu. Pilato a rebola gore a se neelwe.

⁵⁹ Josefa a tsaya serepa, a se phuthela ka lesela le lentle le lesweu,

⁶⁰ a se baya mo lebitleng le lešwa la gagwe, le o neng a le gabile mo lefikeng. Ya re a sena go pitikela lentswe le legolo mo mojakong wa phupu, a tloga.

⁶¹ Maria Magtalena a bo a le teng, le Maria yo mongwe, ba ntse ba lebaganye le phupu.

Ba ba disitseng phupu ya ga Jesu

⁶² Ya re kamoso, e le letsatsi le le latelang la iketleetso, baperesiti ba bagolo le Bafarisai ba phuthegela kwa go Pilato

⁶³ ba re: “Morena, re gakologelwa gore e rile motsietsi yoo a sa ntse a phela, a re: ‘Morago ga malatsi a le mararo ke tla tsoga.’

⁶⁴ Jaanong he, laola gore phupu e disiwe go ya letsatsing la boraro, e se re gongwe barutwa ba gagwe ba tla, ba mo utswa, ba raya batho ba re: ‘O tsogile mo baswing,’ mme tsietso ya morago ya tla ya sulafala bogolo go ya ntlha.”

⁶⁵ Pilato a ba raya a re: “Lekoko la badisa ke leo; tsamayang lo e dise ka fa lo kgonang ka teng.”

⁶⁶ Foo ba tsamaya. Ya re ba sena go kana lentswe, ba disa phupu ka lekoko la badisa.