Mataio 24 - Setswana 1970

Tempele e tla digwa

¹ Foo Jesu a tswa Tempeleng, a tsamaya. Jaanong barutwa ba gagwe ba mo atamela go mo supetsa dikago tsa Tempele.

² Mme a ba fetola a re: “A ga lo bone tsotlhe tse? Ammaaruri ke lo raya ke re: Ga go kitla go lesiwa lentswe lepe fa le tlhatlaganye le le lengwe, le le se kitlang le thujwa.”

Ditlalelo tsa metlha ya bofelo

³ E rile a ntse mo Thabeng ya Diolefa, barutwa ba gagwe ba tla go ene kwa thoko ba re: “Re bolelele gore tseo di tla nna leng, le sesupo sa go tla ga gago le sa bokhutlo jwa metlha eno ya lefatshe se tla nna jang?”

⁴ Jesu a ba araba a re: “Itiseng gore go se nne ope yo o lo timetsang!

⁵ Gonne ba bantsi ba tla tla ka leina la me, mongwe le mongwe a ipitsa a re: ‘Ke nna Keresete.’ Mme ba tla timetsa ba le bantsi.

⁶ Lo tla utlwela dintwa le medumo ya dintwa. Itiseng, mme lo se ka lwa tshoga; gonne go tshwanetse go dirafala; mme e tla bo e ise e nne bokhutlo.

⁷ Gonne setšhaba se tla tsogela setšhaba, le puso e tsogela puso; go bile go tla nna leuba le dithoromo tsa lefatshe kwa le kwa.

⁸ Mme tsotlhe tse ke tshimologo ya maralalo.

⁹ “Metlheng eo ba tla lo tsenya mo pitlaganong, ba lo bolaya; mme lo tla nna ba ba tlhoilweng ke ditšhaba tsotlhe ka ntlha ya leina la me.

¹⁰ Metlheng eo ba bantsi ba tla kgotšwa, ba tshwarisanya, ba tlhoana.

¹¹ Baporofeti ba bantsi ba kako ba tla tsoga, ba timetsa ba bantsi.

¹² Mme lorato lwa ba bantsi lo tla tsidifala ka ntlha ya go ntsifala ga tshiamololo.

¹³ Mme yo o itshokelang go ya bokhutlong ke ene yo o tla pholosiwang.

¹⁴ Mme Efangele e ya puso e tla rerwa mo lefatsheng lotlhe go nna tshupo mo merafeng yotlhe; ke gona bokhutlo bo tla tlang.

Pitlagano e kgolo. Baporofeti ba kako

¹⁵ “E re fa lo bona makgapha a tshenyego a eme mo felong ga boitshepo, a a boletsweng ke moporofeti Daniele” – a yo o buisang a tlhaloganye! –

¹⁶ “foo ba ba mo Jutea a ba tshabele kwa dithabeng.

¹⁷ Yo o mo godimo ga ntlo a a se fologele go tsaya tse di mo ntlong ya gagwe;

¹⁸ le yo o kwa masimo a a se boele kwa morago go tsaya kobo ya gagwe.

¹⁹ A tatlhego wee ya ba baimana le ba ba amusang mo malatsing ao!

²⁰ Mme lo rapele gore tshabo ya lona e se nne mariga, le fa e le ka Sabata;

²¹ gonne ka sebaka seo go tla nna pitlagano e kgolo, e e iseng e ke e nne go tswa mo tshimologong ya lefatshe go tla nakong eno; le gona ga go kitla go tlhola go nna jalo le ka motlha ope.

²² Mme fa malatsi ao a ka bo a sa khutshwafadiwa, go ka bo go sa pholosiwe motho ope; mme malatsi ao a tla khutshwafadiwa ka ntlha ya batlhaolwi.

²³ “Metlheng eo fa mongwe a ka lo raya a re: ‘Bonang, Keresete ke yo,’ gongwe, ‘Ke yole,’ lo se ka lwa dumela;

²⁴ gonne go tla tsoga bokeresete ba kako le baporofeti ba kako; ba tla dira ditshupo tse dikgolo le dikgakgamatso gore fa go ka kgonega ba timetse le batlhaolwi.

²⁵ Tlhokomelang, ke lo boleletse go sa le kwa pele.

²⁶ “Fa jaanong ba lo raya ba re: ‘Bonang, o kwa sekakeng!’ lo se ka lwa tswa; ‘Bonang, o mo matlwaneng!’ lo se ka lwa dumela;

²⁷ gonne go tla ga Morwa-Motho go tla nna jaaka logadima lo lo tleng lo tswe kwa botlhabatsatsi, lo bonalele le kwa bophirimatsatsi.

²⁸ “Kwa setoto se leng teng, manong a tla phuthegela teng.

Go tla ga Morwa-Motho

²⁹ “Ka bonako morago ga pitlagano ya malatsi ao, letsatsi le tla fifala, le ngwedi ga o kitla o ntsha lesedi la ona, le dinaledi di tla wa mo legodimong, le dithata tsa magodimo di tla reketlisiwa.

³⁰ Ke gona go tla bonalang sesupo sa Morwa-Motho kwa legodimong. Foo ditso tsotlhe tsa lefatshe di tla bokolela, mme di tla bona Morwa-Motho a tla ka maru a legodimo ka thata le ka kgalalelo e kgolo.

³¹ O tla roma baengele ba gagwe ka tumo e kgolo ya diphala, ba tla phutha batlhaolwi ba gagwe kwa ntlheng tse nne, go tswa sekhutlong sengwe sa magodimo go ya kwa go se sengwe.

Thuto ka ga mofeie

³² “Lo ithute sekao ka mofeie: E a re fa dikala tsa ona di setse di le dinana, di tlhoga matlhare, lo itse gore selemo se gaufi.

³³ Le lona jalo, e re lo bona dilo tsotlhe tse, itseng gore o gaufi, o fa mojako fela.

³⁴ Ammaaruri ke lo raya ke re: Losika lo ga lo kitla lo fela ka gope, tsotlhe tse di ise di dirafale pele.

³⁵ Legodimo le lefatshe di tla fela, mme mafoko a me ga a kitla a fela ka gope.

Nako ga e itsiwe

³⁶ “Ka ga letsatsi leo le nako eo ga go itse ope, le fa e le baengele ba magodimo le e seng Morwa, fa e se Rara a le esi.

³⁷ Gonne go tla ga Morwa-Motho go tla nna jaaka go ne go le ka malatsi a ga Noa.

³⁸ Go tla nna jaaka go ne go ntse mo malatsing ao a pele ga morwalela: Ba ne ba ja, ba nwa, ba nyala, ba nyalwa, go tla go fitlha mo letsatsing le Noa a tsenyeng mo mokorong o mogolo ka lone,

³⁹ mme ba sa lemoge, ga tsamaya morwalela wa tla, wa ba tsaya botlhe. Go tla ga Morwa-Motho le gona go tla nna jalo.

⁴⁰ Foo banna ba babedi ba tla bo ba le mo masimo; mongwe o tla tsholwa, yo mongwe a tlogelwe.

⁴¹ Basadi ba babedi ba tla bo ba sila mo lelwaleng; mongwe o tla tsholwa, yo mongwe a tlogelwe.

⁴² “Ka moo, phaphamang! Gonne ga lo itse letsatsi le Morena wa lona o tla tlang ka lone.

⁴³ Kana lo a itse gore fa mong wa ntlo a ka bo a itsile nako ya bosigo e legodu le tla tlang ka yona, o ka bo a disitse, a sa leseletsa ntlo ya gagwe go phunngwa.

⁴⁴ Ka moo, le lona, nnang lo iketleeditse; gonne Morwa-Motho o tla tla ka nako e lo sa e gopoleng.

Setshwantsho sa batlhanka ba babedi

⁴⁵ “Jaanong he, motlhanka yo o ikanyegang yo o botlhale ke ofe, yo morena wa gagwe o mo laodisitseng ba ntlo ya gagwe go ba abela dijo ka nako ya tsona?

⁴⁶ Go sego motlhanka yo, yo e tla reng morena wa gagwe a tla, a mo fitlhele a dira jalo.

⁴⁷ Ammaaruri ke lo raya ke re: O tla mo laodisa tsotlhe tse o nang natso.

⁴⁸ Mme fa motlhanka yo o bosula a ka ithaya a re: ‘Morena wa me o diegile,’

⁴⁹ mme a simolola go betsa batlhanka-ka-ene, a ja, a nwa le matagwa,

⁵⁰ morena wa motlhanka yoo o tla tla ka letsatsi le a sa mo lebelelang ka lone le ka nako e a sa e itseng;

⁵¹ o tla mo fatola, a mo neela kabelo ya gagwe le baitimokanyi. Go tla nna selelo le phuranyo ya meno teng.