Mataio 2 - Setswana 1970

Batlhalefi ba botlhabatsatsi

¹ E rile Jesu a sena go tsalelwa kwa Betleheme wa Jutea mo malatsing a kgosi Herote, batlhalefi bangwe ba tswa kwa botlhabatsatsi, ba fitlha mo Jerusalema ba re:

² “Kgosi ya Bajuta e e tsetsweng e fa kae? Gonne re bonye naledi ya yona, re le kwa botlhabatsatsi, mme re tsile go mo obamela.”

³ Ya re kgosi Herote a utlwa, a tshoga le botlhe ba Jerusalema nae.

⁴ A ba a phutha baperesiti ba bagolo botlhe le Baitsedikwalo ba morafe, a tlhotlhomisa mo go bone gore Keresete o tla tsalelwa kae.

⁵ Ba mo araba ba re: “Kwa Betleheme wa Jutea; gonne go kwadilwe jalo ke moporofeti ga twe:

⁶ “ ‘Wena Betleheme wa lefatshe la Juta; ga o mmotlana ka gope mo magosaneng a Juta; gonne mo go wena go tla tswa molaodi yo o tla disang morafe wa me wa Iseraele.’ ”

⁷ Ke fa Herote a biletsa batlhalefi fa thoko, a ba botsa thata ka ga sebaka se naledi e bonetseng ka sona,

⁸ a ba a ba romela kwa Betleheme a re: “Yaang lo tlhotlhomise sentle ka ga ngwana; mme e re lo sena go mmona, lo tle go mpolelela, gore le nna ke ye go mo obamela.”

⁹ Ya re ba sena go utlwa kgosi, ba tsamaya; ba akofa ba bona naledi e ba e bonyeng kwa botlhabatsatsi, ya ba etelela pele, ya ba ya fitlha ya ema e okame felo fa ngwana a leng teng.

¹⁰ Ya re ba bona naledi, ba itumela thata ka boitumelo jo bogolo.

¹¹ Ba feta ba tsena mo ntlong, ba bona ngwana, a na le Maria, mmaagwe. Jaanong ba wela fa fatshe, ba mo obamela, ba be ba phutholola matlotlo a bone, ba mo ntshetsa dineo, e bong gouta le maswalo le mera.

¹² Mme ya re ka ba laetswe ke Modimo ka toro gore ba se ka ba boela kwa go Herote, ba boela kwa lefatsheng la ga bone ka tsela e sele.

Josefa o tshabela kwa Egepeto

¹³ E rile ba sena go tloga, moengele wa Morena a bonala fa go Josefa ka toro, a mo raya a re: “Nanoga o tsee ngwana le mmaagwe, o tshabele kwa Egepeto, o be o nne teng go tsamaya ke go itsise; gonne Herote o ikemiseditse go batla ngwana gore a mmolae.”

¹⁴ Ke fa a tsoga, a tsaya ngwana le mmaagwe bosigo, a tloga a ya kwa Egepeto;

¹⁵ a nna teng ga tsamaya Herote a swa, gore go dirafale se se builweng ke Morena ka moporofeti a re: “Ke biditse morwaake kwa Egepeto.”

Herote o bolaya bana

¹⁶ E rile jaanong Herote a lemoga gore batlhalefi ba mo forile, a gakala thata, a ba a romela batlhanka go bolaya basimanyana botlhe kwa Betleheme le mo tikologong yotlhe ya teng, go simolola ka ba dinyaga tse pedi le bomonnaa-bone, ka fa sebakeng se o se tlhotlhomisitseng mo batlhalefing.

¹⁷ Ka go dira jalo ga dirafala se se builweng ke moporofeti Jeremia a re:

¹⁸ “Lentswe le ne la utlwala kwa Rama, selelo le khutsafalo e kgolo; Ragele a lelela bana ba gagwe, mme a gana go gomodiwa, gonne ga ba tlhole ba le teng.”

Josefa o boela gae

¹⁹ Jaanong ya re Herote a sena go swa, moengele wa Morena a bonala fa go Josefa kwa Egepeto ka toro a re:

²⁰ “Tsoga o tsee ngwana le mmaagwe, o boele kwa lefatsheng la Iseraele; gonne ba ba neng ba batla go bolaya ngwana ba sule.”

²¹ A tsoga, a tsaya ngwana le mmaagwe, a boela kwa lefatsheng la Iseraele.

²² Ya re a utlwa gore Aregelao o busa kwa Jutea mo boemong jwa ga Herote rraagwe, a boifa go ya teng; mme ya re a sena go laelwa ke Modimo ka toro, a fetela kwa lefatsheng la Galelea,

²³ a ba a fitlha a aga mo motseng o o bidiwang Nasaretha; ka go dira jalo ga dirafala se se builweng ke baporofeti ba re: “O tla bidiwa Monasaretha.”