Mataio 17 - Setswana 1970

Morena o galalediwa kwa thabeng

¹ Morago ga malatsi a marataro Jesu a tsaya Petoro le Jakobo le Johane, morwa-rraagwe, a tlhatlogela nabo mo thabeng e e kwa godimo ba le bosi.

² Foo a fetoga setshwano fa pele ga bone; sefatlhego sa gagwe sa phatsima jaaka letsatsi, diaparo tsa gagwe tsa nna ditshweu jaaka lesedi.

³ Ke fa Moše le Elia ba bonala fa go bone, ba bua nae.

⁴ Mme Petoro a simolola go bua, a raya Jesu a re: “Morena, go monate mo go rona go nna fano; fa ò rata, ke tla dira metlaagana e meraro fano, o mongwe e nne wa gago, o mongwe wa ga Moše, o mongwe wa ga Elia.”

⁵ Ya re a sa ntse a bua, leru le le lesedi la ba ritifalela ka tshoganyetso, le lentswe la tswa mo lerung la re: “Yoo ke Morwaake yo o rategang, yo ke mo itumelelang; mo utlweng!”

⁶ Ya re barutwa ba le utlwa, ba wela fa fatshe ka difatlhego, ba boifa segolo.

⁷ Foo Jesu a tla, a ba ama a re: “Tsogang, se boifeng!”

⁸ Ya re ba tsholetsa matlho, ba se ka ba bona ope, fa e se Jesu a le esi.

⁹ Ya re ba fologa mo thabeng, Jesu a ba laela a re: “Lo se ka lwa bolelela ope pono e, go tsamaya Morwa-Motho a tsosiwe mo baswing.”

¹⁰ Barutwa ba gagwe ba mmotsa ba re: “Ke go reng, fa Baitsedikwalo ba re, Elia o tshwanetse go tla pele?”

¹¹ Mme a araba a re: “Ka nnete Elia o e tla, o tla tsosolosa tsotlhe.

¹² Mme ke lo raya ke re: Elia o setse a tsile, mme ga ba a ka ba mo itse, ba dirile ka ene ka fa ba ratileng ka teng. Morwa-Motho le ene ba tla mmogisa jalo.”

¹³ Ke fa barutwa ba gagwe ba tlhaloganya gore o bua nabo ka ga Johane Mokolobetsi.

Phodiso ya molwetse wa seebana

¹⁴ E rile ba sena go fitlha kwa bathong, ga tla motho mongwe kwa go ene, a mo khubamela a re:

¹⁵ “Morena, utlwela morwaake botlhoko; gonne o a karalala, o bogisega thata; ke gantsi a wela mo molelong le gantsi mo metsing.

¹⁶ Ke ne ke mo tlisitse kwa barutweng ba gago, mme ba paletswe ke go mo fodisa.”

¹⁷ Jesu a fetola a re: “A batho ba ba sa dumeleng, ba ba kgopo! Kana ke tla nna le lona go fitlhelela leng? Ke tla lo itshokela goleele go le kae? Mo tsiseng kwano go nna!”

¹⁸ Foo Jesu a kgalemela modemone, wa tswa mo go ene, mme mosimane a fola e sa le ka nako eo.

¹⁹ Jaanong barutwa ba tla kwa go Jesu kwa thoko ba re: “Ke go reng, fa rona re reteletswe ke go o kgarameletsa ntle?”

²⁰ A ba raya a re: “Ke ka gore lo tlhoka tumelo; gonne ammaaruri ke lo raya ke re: Fa lo na le tumelo, le fa e le e e kana ka tlhaka ya peo ya mmasetete fela, lo ka raya thaba e lo a re: ‘Tloga fa, o ye fale!’ mme e tla ya, go se na sepe se se ka lo palelang.

²¹ Mme mofuta o ga o tswe, fa e se ka thapelo le ka go itima dijo.”

Polelelopele ya bobedi ya dipogo

²² Ya re ba ntse ba kopana mo Galelea, Jesu a ba raya a re: “Morwa-Motho o tla neelwa mo diatleng tsa batho.

²³ Ba tla mmolaya; mme o tla tsosiwa ka letsatsi la boraro.” Foo ba hutsafala thata.

Jesu o duela lekgetho la Tempele

²⁴ E rile ba sena go fitlha kwa Kaperenaume, ba ba amogelang lekgetho la Tempele ba tla kwa go Petoro ba re: “A moruti wa lona ga a ntshe lekgetho la Tempele?”

²⁵ Ene a re: “Nnyaya, o a le ntsha.” Ya re a tsena mo ntlong, Jesu a mo raka ka puo a re: “O gopolang, Simone? Dikgosi tsa lefatshe di amogela makgetho a kgwebo gongwe a tlhogo ya motho mo go bomang? A ke mo go bomorwaa-tsona gongwe mo bathong ba bangwe?”

²⁶ Mme ya re a re: “Mo bathong ba bangwe,” Jesu a mo raya a re: “Fa go le jalo, bomorwa ba gololesegile.

²⁷ Le gale a re se ba kgopise; yaa kwa letsheng, ò latlhele kobe mo teng, mme tlhapi e ò e tshwarang pele, o e tsee, ò e atlhamolose; ò tla fitlhela ledi la selefera; le tsee, ò le ba neele, e nne lekgetho la me le la gago.”