Mataio 15 - Setswana 1970

Ka ga boitsheko le boitshekologo

¹ Jaanong ga tla go Jesu Bafarisai le Baitsedikwalo, ba tswa kwa Jerusalema ba re:

² “Ke go reng, fa barutwa ba gago ba tlhokomologa ngwao ya bagolo? Ka gonne ga ba tlhape diatla, fa ba ja.”

³ Ene a ba araba a re: “Ke go reng, fa le lona lo tlola taolo ya Modimo ka ntlha ya ngwao ya lona?

⁴ Gonne Modimo o rile: ‘Tlotla rraago le mmaago.’ Gape wa re: ‘Yo o hutsang rraagwe gongwe mmaagwe, o na le go swa.’

⁵ Mme lona lo a re: ‘Fa motho a raya rraagwe gongwe mmaagwe a re: Se nka bong ke go thusa ka sona, se abetswe Modimo,’

⁶ ga go batlege gore a tlotle rraagwe gongwe mmaagwe ka gope. Lo dirolotse Lefoko la Modimo ka ntlha ya ngwao ya lona.

⁷ Baikaketsi ke lona! Jesaya o boleletse pele sentle ka ga lona a re:

⁸ “ ‘Batho ba, ba ntlotla ka melomo, mme dipelo tsa bone di kgakala le nna.

⁹ Mme ba nkobamelela lefela, ka ba ruta dithuto tse e leng ditaelo tsa batho.’ ”

Se se itshekololang motho

¹⁰ Jaanong a ipiletsa batho, a ba raya a re: “Utlwang lo tlhaloganye:

¹¹ Se se tsenang ka legano ga se sona se se itshekololang motho; mme se se tswang ka molomo ke sona se se itshekololang motho.”

¹² Ke fa barutwa ba tla go ene, ba mo raya ba re: “A o itse gore e rile Bafarisai ba utlwa lefoko leo, ba kgopega?”

¹³ A araba a re: “Setlhatshana sengwe le sengwe se Rre wa legodimo o sa se tlhomang, se tla kumolwa ka medi.

¹⁴ Ba leseng; ke difofu tse di gogang difofu. Mme fa sefofu se goga sefofu, di tla wela mmogo mo kgatamping.”

¹⁵ Petoro a mo fetola a re: “Re ranolele setshwantsho se.”

¹⁶ Ene a re: “A le lona lo sa ntse lo tlhoka tlhaloganyo?

¹⁷ A ga lo lemoge gore tsotlhe tse di tsenang ka legano di fetela mo mpeng, di be di ye go latlhelwa kwa ntle?

¹⁸ Mme tse di tswang ka molomo di tswa mo pelong; ke tsona tse di itshekololang motho;

¹⁹ gonne mo pelong go tswa dikakanyo tse di bosula, e bong dipolao le tsa boikanyologo jwa banyalani le tsa boaka le tsa bogodu le ditshupo tsa maaka le dikgalo.

²⁰ Ke tsona tse di itshekololang motho. Mme go ja ka diatla tse di sa tlhapiwang ga go itshekolole motho.”

Mosadi wa Mokanana

²¹ Foo Jesu a tloga teng, a ya ntlheng ya Tiro le Sitone.

²² Mme teng ga tla mosadi wa Mokanana wa naga eo, a goa a re: “Nkutlwela botlhoko, Morena, Morwa Dafita! Morwadiake o tshwenngwa thata ke modemone.”

²³ Mme a se ka a mo araba ka lefoko lepe. Barutwa ba gagwe ba tla go ene, ba mo rapela ba re: “Dira gore a tsamae; gonne o re goeletsa morago.”

²⁴ A fetola a re: “Ga ke a rongwa gope, fa e se kwa dinkung tse di latlhegileng tsa ntlo ya Iseraele.”

²⁵ Ke fa mosadi a tla, a mo obamela a re: “Morena, nthusa!”

²⁶ Jesu a araba a re: “Ga go a tshwanela go tsaya senkgwe sa bana go se latlhela dintšwanyana.”

²⁷ Ene a fetola a re: “Ee, Morena, gonne le tsona dintšwanyana di a tle di je matlhotlhora a a wang mo tafoleng ya beng ba tsona.”

²⁸ Foo Jesu a mo araba a re: “Mosadi, tumelo ya gago e kgolo! A go go dirafalele ka fa o eletsang ka teng.” Mme morwadie a fola e sa le ka nako eo.

Ntsifatso ya bobedi ya dinkgwe

²⁹ Jesu a tloga teng, a ya fa letsheng la Galelea, a ba a tlhatlogela mo thabeng, a nna teng.

³⁰ Foo ga tla go ene masomo a magolo a batho, ba na le batlhotsi le digole le difofu le dimumu le balwetse ba bangwe ba le bantsi, ba ba baya fa dinaong tsa gagwe, mme a ba fodisa,

³¹ mo batho ba bileng ba gakgamala, ka ba bona dimumu di bua, le digole di fodile, le batlhotsi ba tsamaya, le difofu di bona, ba be ba galaletsa Modimo wa Iseraele.

³² Foo Jesu a ipiletsa barutwa ba gagwe a re: “Ke tlhomogela batho ba pelo, ka gonne ba setse ba tlhotse le nna malatsi a mararo, ba se na se ba ka se jang. Mme ga ke rate go ba phatlalatsa ka tlala, e se re gongwe ba felelwa ke thata mo tseleng.”

³³ Barutwa ba mo raya ba re: “Re ka bona kae dinkgwe mono sekakeng, tse di ka lekanang go kgorisa bontsi jo bo kanakana?”

³⁴ Jesu a ba raya a re: “Lo na le dinkgwe di le kae?” Ba re: “Di a supa, le ditlhatswana di se kae.”

³⁵ Ya re a sena go laela batho gore ba nne fa fatshe,

³⁶ a tsaya dinkgwe tse di supang le ditlhapi, a leboga, a di nathoganya, a di neela barutwa, mme barutwa ba di abela batho.

³⁷ Ba be ba ja botlhe, ba a kgora; ba sela masadisa, a tlala diroto tse di supang.

³⁸ Ba ba jeleng e ne e le banna ba ba dikete tse nne, go sa balwe basadi le bana.

³⁹ Ya re a sena go naya batho tsela, a palama mokoro, a ya kwa nageng ya Magatala.