Mataio 1 - Setswana 1970

Lotso lwa ga Jesu Keresete

¹ Lokwalo lwa lotso lwa ga Jesu morwa Dafita, morwa Aborahame.

² Aborahame o ne a tsala Isaka; Isaka a tsala Jakobe; Jakobe a tsala Juta le bomorwa-rraagwe.

³ Juta le Thamare ba tsala Pherese le Sera; Pherese a tsala Heserone; Heserone a tsala Rame;

⁴ Rame a tsala Aminatabe; Aminatabe a tsala Nasone; Nasone a tsala Salema;

⁵ Salema le Rahabe ba tsala Boase; Boase le Ruthe ba tsala Obete.

⁶ Obete a tsala Isai; Isai a tsala kgosi Dafita. Dafita le mogatsa-Uria ba tsala Salomo.

⁷ Salomo a tsala Rehabeame; Rehabeame a tsala Abia; Abia a tsala Asa;

⁸ Asa a tsala Josafate; Josafate a tsala Jorame; Jorame a tsala Usia;

⁹ Usia a tsala Jothame; Jothame a tsala Ahase; Ahase a tsala Hesekia;

¹⁰ Hesekia a tsala Manase; Manase a tsala Amone; Amone a tsala Josia;

¹¹ Josia a tsala Jegonya le bomorwa-rraagwe ka sebaka sa go hudusediwa kwa Babilone.

¹² E rile morago ga go hudusediwa kwa Babilone, Jegonya a tsala Salathiele; Salathiele a tsala Serubabele;

¹³ Serubabele a tsala Abiute; Abiute a tsala Eliakime;

¹⁴ Eliakime a tsala Asore; Asore a tsala Satoke; Satoke a tsala Agime; Agime a tsala Eliute;

¹⁵ Eliute a tsala Eleasare; Eleasare a tsala Mathane; Mathane a tsala Jakobe;

¹⁶ Jakobe a tsala Josefa, monna wa ga Maria yo o belegeng Jesu yo o bidiwang Keresete.

¹⁷ Jalo he ditshika tsotlhe, go simolola ka Aborahame go tla go fitlha mo go Dafita, ke ditshika di le 14; le go tswa mo go Dafita go tla go fitlha mo sebakeng sa go hudusediwa kwa Babilone ke ditshika di le 14; le go tswa mo sebakeng sa go hudusediwa kwa Babilone go tla go fitlha mo go Keresete ke ditshika di le 14.

Go tsalwa ga Jesu

¹⁸ Go tsalwa ga Jesu Keresete go ne go le jaana: E rile Maria mmaagwe a sena go beelelwa ke Josefa, ba ise ba kopane, a bonwa a le moimana ka Mowa o o Boitshepo.

¹⁹ Josefa, lekau la gagwe, ka a siame, mme a sa rate go mo tlhabisa ditlhong, a ikaelela go mo tlhanogela mo sephiring.

²⁰ Ya re a ntse a akanya jalo, moengele wa Morena a bonala fa go ene ka toro a re: “Josefa, morwa Dafita, se boife go tsaya Maria go nna mosadi wa gago; gonne boimana jwa gagwe bo tswa mo Moweng o o Boitshepo.

²¹ O tla belega mosimane, mme wena o bitse leina la gagwe Jesu; gonne ke ene yo o tla gololang batho ba gagwe mo dibeng tsa bone.”

²² Gotlhe moo go dirafetse gore go dirafale se se builweng ke Morena ka moporofeti a re:

²³ “Bonang, lekgarebe le tla ima, le belega mosimane; mme ba tla bitsa leina la gagwe Imanuele.” Ka phetolo ke go re: “Modimo o na le rona.”

²⁴ Ya re Josefa a tsoga mo borokong, a dira ka fa moengele wa Morena a mo laetseng ka teng, a tsaya mosadi wa gagwe;

²⁵ mme a se ka a kopana nae ga tsamaya a belega ngwana wa ntlha wa gagwe wa mosimane; a ba a bitsa leina la gagwe Jesu.