Mareko 4 - Setswana 1970

Setshwantsho sa mojwadi

¹ Jaanong a boa a simolola gape go ruta fa letsheng. A phuthegelwa ke batho ba bantsi, mo o bileng a palama mokoro, a nna teng a le mo letsheng, batho botlhe ba le mo lefatsheng fa letsheng.

² A ba ruta dilo tse dintsi ka ditshwantsho. Ya re a ruta, a ba raya a re:

³ “Reetsang! Mojwadi o ne a ya go jwala.

⁴ Ya re a ntse a jwala, ditlhaka dingwe tsa wela mo tseleng; dinonyane tsa tla, tsa di ja.

⁵ Tse dingwe tsa wela mo majweng, fa go se nang mmu o montsi teng; tsa akofa tsa tlhaba, ka di tlhoka mmu o o boteng.

⁶ Mme ya re letsatsi le sena go tlhaba, tsa swaba; mme ya re ka di se na medi, tsa omelela.

⁷ Tse dingwe tsa wela mo mitlweng; mme mitlwa ya gola, ya di hupetsa, tsa se ka tsa ungwa.

⁸ Tse dingwe tsa wela mo mmung o o molemo, tsa ungwa di sena go tlhoga le go gola; tsa tsala, tse dingwe ga 30, tse dingwe ga 60, tse dingwe ga 100.”

Jesu o bolelelang ditshwantsho

⁹ A ba a re: “Yo o nang le ditsebe go utlwa, a a utlwe!”

¹⁰ E rile a le esi, ba ba fa go ene, ba na le ba ba 12, ba mmotsa ka ga setshwantsho se.

¹¹ A ba raya a re: “Lona lo neilwe bosaitsiweng jwa puso ya Modimo; mme ba ba kwa ntle bone, tsotlhe di ba dirafalela ka ditshwantsho,

¹² gore “ ‘go bona ba bone, mme ba se ka ba lemoga, le go utlwa ba utlwe, mme ba se ka ba tlhaloganya, e se re gongwe ba sokologa, ba itshwarelwa dibe.’ ”

Tlhaloso ya setshwantsho sa mojwadi

¹³ A ba a ba raya a re: “A ga lo tlhaloganye setshwantsho se? Mme ditshwantsho tsotlhe lo tla di lemoga jang?

¹⁴ Mojwadi o jwala Lefoko.

¹⁵ Ba ba tshwanang le tsela, kwa Lefoko le jwalwang teng, ke ba: E a re ba utlwa, Satane a akofe a tle, a tlose Lefoko le le jwetsweng go bone.

¹⁶ Le gona jalo ba go jwalwang mo majweng ke ba e a reng ba utlwile Lefoko, ba akofe ba le tshole ka boitumelo;

¹⁷ mme ga ba na medi mo go bone, ke ba ba se nang tlhomamo, mme e re fa go tsoga pitlagano gongwe pogiso morago ka ntlha ya Lefoko, ba akofe ba kgopisege.

¹⁸ Ba bangwe ke ba go jwalwang mo mitlweng; ke ba ba utlwileng Lefoko.

¹⁹ Mme matshwenyego a metlha eno le tsietso ya lehumo le dikeletso tsa dilo tse dingwe di tsene, di hupetse Lefoko, mme le tlhoke leungo.

²⁰ Ba go jwetsweng mo mmung o o molemo ke ba ba utlwang Lefoko, ba le tshole, ba ungwe, bangwe ga 30, ba bangwe ga 60, ba bangwe ga 100.”

Setshwantsho sa lobone

²¹ A ba raya a re: “A lobone lo a tle lo tshujwe gore lo bewe ka fa tlase ga kgamelo, gongwe ka fa tlase ga bolao? A ga ke re, lo bewa mo setlhomong?

²² Gonne ga go na sepe se se fitlhegileng se se sa tshwanelang go bonala; le gona ga go a dirafala sepe se subegile se se sa tshwanelang go senoga.

²³ Fa mongwe a na le ditsebe go utlwa, a a utlwe!”

²⁴ A ba a ba raya a re: “Tlhokomelang se lo se utlwang! Selekanyo se lo lekanyang ka sona, lo tla lekanyediwa ka sona, lo be lo okelediwa lona ba lo utlwang.

²⁵ Gonne yo o tshotseng sengwe o tla okelediwa; mme yo o se nang sepe, le se o nang naso o tla se amogwa.”

Setshwantsho sa peo

²⁶ A bua a re: “Puso ya Modimo e ntse jaana, jaaka fa motho a jwala peo mo tshimong.

²⁷ Mme a robale, a tsoge, bosigo le motshegare, peo e mele, e gole, ene a sa itse gore jang.

²⁸ Lefatshe le ikungwisa ka losi, pele go tswe mogwang, morago seako, morago mabele a a tletseng mo seakong.

²⁹ Mme e re fa mabele a budule, a akofe a tsenye thipa, ka gonne thobo e fitlhile.”

Setshwantsho sa peo ya mmasetete

³⁰ A boa a re: “Re ka tshwantsha puso ya Modimo jang? Gongwe re ka e bapisa ka setshwantsho sefe?

³¹ E tshwana le tlhaka ya peo ya mmasetete, e e a reng e jwalwa mo mmung, e be e le potlana mo dipeong tsotlhe tse di mo lefatsheng.

³² Mme fa e jwetswe, e mele, e nne kgolo go feta merogo yotlhe, e ntshe dikala tse dikgolo, mo dinonyane tsa leapi di bileng di ka aga dintlhaga mo go tsona mo moriting.”

³³ A ba bolelela Lefoko ka ditshwantsho tse dintsi tse di ntseng jalo ka fa ba nonofileng go utlwa ka teng.

³⁴ A se ka a bua nabo kwa ntle ga setshwantsho, mme e ne ya re fa ba le bosi, a phuthololele barutwa ba gagwe tsotlhe.

Jesu o didimatsa letsha

³⁵ Ya re ka letsatsi leo, go le maitsiboa, a ba raya a re: “A re tsheleleng kwa moseja.”

³⁶ Ba phatlalatsa batho, ba tsamaya nae fela a ntse a le mo mokorong. Mme mekoro e mengwe ya mo pata.

³⁷ Jaanong ga tsoga matsubutsubu a magolo a phefo, makhubu a metsi a tlolela mo mokorong, mokoro wa ba wa batla go tlala,

³⁸ ene a bo a le kwa morago mo mokorong, a robetse mo mosamong. Ba mo tsosa, ba mo raya ba re: “Moruti, a ga o re sepe, fa re nyelela?”

³⁹ A tsoga, a kgalemela phefo, a raya letsha a re: “Kgaotsa o didimale!” Phefo ya khutla, ga ba ga nna tidimalo e kgolo.

⁴⁰ A ba raya a re: “Ke eng, fa lo le boi jaana? Ke go reng, fa lo se na tumelo?”

⁴¹ Bone ba boifa ka poifo e kgolo, ba raana ba re: “Kana yo ke mang, fa phefo le letsha le tsona di mo utlwa?”