Luke 3 - Setswana 1970

Go rera ga Johane Mokolobetsi

¹ E rile ka ngwaga wa 15 wa puso ya Kaisara Tiberio, fa Pontio Pilato a le molaodi wa Jutea, le Herote a le kgosi ya Galelea, le Filipo morwa-rraagwe a le kgosi ya Iturea le lefatshe la Teragoniti, le Lesania a le kgosi ya Abilene,

² le Hanase le Kaifase e le baperesiti ba bagolo, Lefoko la Modimo la tla kwa go Johane, morwa Sagaria, a le mo sekakeng.

³ Jaanong a fitlha mo lefatsheng lotlhe le le mo tikologong ya Joretane, a rera kolobetso ya tlhabologo e e isang boitshwarelong jwa dibe,

⁴ ka fa go kwadilweng ka teng mo lokwalong lwa mafoko a ga Jesaya wa Moporofeti ga twe: “Lentswe la mongwe yo o kuang mo sekakeng la re: ‘Baakanyang tsela ya Morena, siamisang mebila ya gagwe!

⁵ A dikhuti tsotlhe di katelwe, dithaba tsotlhe le dithota di phadimolwe; ditsela tse di manyokenyoke di tlhamaladiwe, tse di magwata di rethefadiwe!

⁶ Foo batho botlhe ba tla bona pholoso ya Modimo.’ ”

⁷ Ya baa gona a rayang masomo a batho ba ba tsileng go kolobediwa ke ene a re: “Losika lwa dinoga ke lona! Lo tlhagisitswe ke mang go tila bogale jo bo tlang?

⁸ Ka moo, ntshang maungo a a tshwanetseng tlhabologo. Lo se ka lwa simolola go ithaya lo re: ‘Re bana ba ga Aborahame’; gonne ke lo raya ke re: Modimo o nonofile go tsosetsa Aborahame bana ka majwe a.

⁹ Mme le gona selepe se setse se beilwe mo meding ya ditlhare; jaanong he, setlhare sengwe le sengwe se se sa ungweng leungo le le molemo se tla rengwa, se latlhelwa mo molelong.”

¹⁰ Foo batho ba mmotsa ba re: “Jaanong re dire eng?”

¹¹ A ba araba re: “Yo o nang le dikobo di le pedi, a a abele yo o se nang epe; le yo o nang le dijo, a a dire jalo.”

¹² Bakgethisi le bone ba tla go kolobediwa, ba mmotsa ba re: “Moruti, rona re dire eng?”

¹³ A ba raya a re: “Se kgethiseng go fetisa mo lo go laetsweng.”

¹⁴ Batlhabani le bone ba mmotsa ba re: “Mme fa e le rona, re dire eng?” A ba raya a re: “Se gateleleng ope, se lefiseng ope ka patiko; mme lo itumelele tuelo ya lona fela.”

¹⁵ Ya re batho ba le mo tebelelong, mme botlhe ba akanya mo dipelong tsa bone ka ga Johane gore a jaana ga e ka ne e le ene Keresete,

¹⁶ Johane a ba raya botlhe a re: “Nna ke lo kolobetsa ka metsi; mme go tla tla yo o nonofileng bogolo go nna, yo ke sa lekanang go funolola kgole ya ditlhako tsa gagwe; ene yoo o tla lo kolobetsa ka Mowa o o Boitshepo le ka molelo.

¹⁷ Loselo lwa gagwe lo mo seatleng sa gagwe go olosetsa ruri se se mo seboaneng sa gagwe, le go phuthela mabele mo sefaleng sa gagwe, mme moko o tla o tshuba ka molelo o o sa ka keng wa tingwa.”

¹⁸ A nna a rerela batho Efangele, a ba laya le ka mafoko a mantsi a mangwe.

Johane o a golegwa

¹⁹ Jaanong ya re kgosi Herote a kgalemelwa ke ene ka ntlha ya ga Herodia, mosadi wa ga Filipo morwa-rraagwe le ka ntlha ya tsotlhe tse di bosula tse Herote a di dirileng,

²⁰ a fela a oketsa tsotlhe tseo ka go tswalela Johane mo ntlong ya kgolegelo.

Kolobetso ya ga Jesu

²¹ Ya re batho botlhe ba kolobediwa, Jesu le ene a sena go kolobediwa, mme a rapela, legodimo la bulega,

²² mme Mowa o o Boitshepo wa fologela mo go ene ka popego ya lephoi, mme ga utlwala lentswe le le tswang kwa legodimong le re: “O Morwaake yo o rategang, yo ke go itumelelang.”

Lotso lwa ga Jesu

²³ E rile Jesu a simolola go ruta, a bo a na le dinyaga tse di ka neng di le 30, mme – jaaka go ne go gopolwa – ya bo e le morwa Josefa, wa ga Eli,

²⁴ wa ga Mathate, wa ga Lefi, wa ga Melegi, wa ga Janai, wa ga Josefa,

²⁵ wa ga Mathatia, wa ga Amose, wa ga Nahume, wa ga Esedi, wa ga Nagai,

²⁶ wa ga Maathe, wa ga Mathatia, wa ga Simei, wa ga Josega, wa ga Jota,

²⁷ wa ga Joanane, wa ga Resa, wa ga Serubabele, wa ga Salathiele, wa ga Neri,

²⁸ wa ga Melegi, wa ga Adi, wa ga Kosame, wa ga Elematame, wa ga Ere,

²⁹ wa ga Jesua, wa ga Eliesere, wa ga Jorime, wa ga Mathate, wa ga Lefi,

³⁰ wa ga Simeone, wa ga Juta, wa ga Josefa, wa ga Joname, wa ga Eliakime,

³¹ wa ga Melea, wa ga Menane, wa ga Mathata, wa ga Nathane, wa ga Dafita,

³² wa ga Isai, wa ga Obete, wa ga Boase, wa ga Salema, wa ga Nasone,

³³ wa ga Aminatabe, wa ga Rame, wa ga Heserone, wa ga Pherese, wa ga Juta,

³⁴ wa ga Jakobe, wa ga Isaka, wa ga Aborahame, wa ga Thara, wa ga Nahore,

³⁵ wa ga Seruge, wa ga Rehu, wa ga Phelege, wa ga Ebere, wa ga Sela,

³⁶ wa ga Kenane, wa ga Arephagasadi, wa ga Seme, wa ga Noa, wa ga Lamege,

³⁷ wa ga Methusala, wa ga Henoge, wa ga Jarete, wa ga Mahalalele, wa ga Kenane,

³⁸ wa ga Enose, wa ga Sethe, wa ga Atame, wa Modimo.