Luke 23 - Setswana 1970

Jesu o fa pele ga Pilato

¹ Jaanong lekoko lotlhe la bone la nanoga, la mo isa go Pilato.

² Ba simolola go mo latofatsa ba re: “Re bonye yo, a timetsa morafe wa rona, a o iletsa go ntshetsa Kaisara lekgetho, a ipolela, fa e le ene Keresete, kgosi.”

³ Pilato a mmotsa a re: “A ke wena Kgosi ya Bajuta?” A mo araba a re: “O bolela jalo.”

⁴ Foo Pilato a raya baperesiti ba bagolo le matshutitshuti a batho a re: “Ga ke bone molato ope mo mothong yo.”

⁵ Mme bone ba tatalala ba re: “O hudua batho ka go rutaruta mo Jutea yotlhe; o simolotse kwa Galelea go fitlha fano.”

Jesu o fa pele ga Herote

⁶ Ya re Pilato a utlwa ka ga Galelea, a botsa gore a motho yo ke Mogalelea.

⁷ Ya re a sena go tlhaloganya gore ke wa taolo ya ga Herote, a mo romela go Herote, yo le ene o ne a le mo Jerusalema ka malatsi ao.

⁸ E rile Herote a bona Jesu, a itumela thata; gonne o ne a sa bolo go eletsa go mmona, ka a ne a utlwile ka ga gagwe; mme a solofela gore o tla bona sesupo sengwe se dirwa ke ene.

⁹ A mmotsa mafoko a mantsi; mme ene a se ka a mo araba sepe.

¹⁰ Baperesiti ba bagolo le Baitsedikwalo ba ema ba mo latofatsa ka kgakalo.

¹¹ Herote a mo nyatsa mmogo le badiredi ba gagwe, a mo sotla; a ba a mo apesa seaparo se se phatsimang, a mmusetsa kwa go Pilato.

¹² Mme Herote le Pilato ba tsalana ka letsatsi leo; gonne e rile pele ba bo ba tlhoanye.

Jesu o atlholelwa loso

¹³ E rile Pilato a sena go phutha baperesiti ba bagolo le banna ba lekgotla le legolo le morafe,

¹⁴ a ba raya a re: “Lo tsisitse motho yo kwano go nna, jaaka mongwe yo o faposang batho. Kana ke mmotsoloditse fa pele ga lona, mme ka se ka ka bona molato ope mo go ene wa tse lo mo latofatsang ka tsona.

¹⁵ Nnyaya, le e seng Herote; gonne o mmuseditse kwano go rona; mme bonang, ga go sepe se a se dirileng se se tshwanetseng loso.

¹⁶ Ka moo ke tla mo watlhaya ke be ke mo golola.”

¹⁷ Kana o ne a tshwanetse go ba gololela mongwe ka moletlo.

¹⁸ Jaanong ba goela gongwe ba re: “Tlosa yo, mme o re gololele Barabase.”

¹⁹ Yoo o ne a tsentswe mo ntlong ya kgolegelo ka ntlha ya pheretlho nngwe e e dirilweng mo motseng, le ka ntlha ya polao.

²⁰ Mme Pilato a bua nabo gape, ka a rata go golola Jesu.

²¹ Fela ba goa gape ba re: “Mmapole, mmapole!”

²² A boa a ba raya lwa boraro a re: “Kana yo, o dirile bosula bofe? Ga ke a bona molato ope o o tshwanetseng loso mo go ene; ka moo ke tla mo watlhaya ke be ke mo golola.”

²³ Mme ba mo emelela ka mantswe a magolo, ba mo pateletsa gore a bapolwe, mme mantswe a bone le a baperesiti ba bagolo a fenya.

²⁴ Ke fa Pilato a atlhola gore go dirwe ka fa ba batlang ka teng.

²⁵ A ba a golola yo o ne a tsentswe mo ntlong ya kgolegelo ka ntlha ya pheretlho le polao, yo ba mo lopileng; mme Jesu ene a mo neela mo thatong ya bone.

Jesu o mo tseleng go ya Golegotha

²⁶ E rile ba mo isa polaong, ba tshwara mongwe, e bong Simone wa Kirene, a tswa kwa tshimong, ba mmelesa sefapaano gore a se sikare fa morago ga Jesu.

²⁷ Jaanong lekoko le legolo la batho la mo sala morago, le la basadi ba ba bileng ba ithwele megono, ba mo lelela.

²⁸ Foo Jesu a retologela kwa go bone a re: “Bomorwadia Jerusalema, se nteleleng, bogolo lo itelele, lo be lo lelele bana ba lona;

²⁹ gonne itseng, malatsi a e tla, a ba tla buang ka ona ba re: ‘Go sego meopa le mebele e e iseng e ke e belege le mabele a a iseng a ke a amuse.’

³⁰ Foo ba tla simolola go raya dithaba ba re: ‘Re weleng godimo!’ le makgabana ba re: ‘Re khurumetseng!’

³¹ Gonne fa ba dira dilo tse mo setlhareng se setala, go tla dirafalang mo go se se omeletseng?”

³² Ga ba ga isiwa basenyi bangwe ba le babedi go bolawa nae.

Papolo

³³ E rile ba fitlha mo felong fa go bidiwang “Logata”, ba mmapolela teng le basenyi bao, mongwe ka fa letsogong le le jang, yo mongwe ka fa go la molema.

³⁴ Jesu a bua a re: “Rara, ba itshwarele; gonne ga ba itse se ba se dirang.” Mme ba kgaogana diaparo tsa gagwe ka go tlhama tengwa.

³⁵ Batho ba eme ba lebile. Mme banna ba lekgotla le legolo ba nna ba mo kgoba ba re: “O pholositse ba bangwe, a a ipholose, fa e le ene Keresete, Motlhaolwi wa Modimo.”

³⁶ Le batlhabani ba mo sotla, ba tla go ene, ba mo tsisetsa motatsa

³⁷ ba re: “Fa o le Kgosi ya Bajuta, ipholose.”

³⁸ Mme ga bo go le sekwalo fa godimo ga gagwe, se se kwadilweng ka ditlhaka tsa Segerika le Seroma le Sehebere se re: “YO KE KGOSI YA BAJUTA.”

³⁹ Mongwe wa basenyi ba ba pegilweng a mo kgala a re: “A ga o Keresete ne? Ipholose, le rona o re pholose.”

⁴⁰ Yo mongwe a fetola, a mo kgalemela a re: “A le wena ga o boife Modimo, etswe o atlhotswe fela jaaka ene?

⁴¹ Kana, fa e le rona, go re siametse; gonne re bona tse di tshwanetseng tse re di dirileng; mme yo, ene ga a dira sepe se se sokameng.”

⁴² A ba a raya Jesu a re: “Morena, o nkgopole motlhang o tsenang mo bogosing jwa gago.”

⁴³ Jesu a mo raya a re: “Ammaaruri ke go raya ke re: Kajeno o tla nna le nna mo Parateiseng.”

Loso lwa ga Jesu

⁴⁴ Jaanong e ne e setse e ka nna nako ya motshegare; mme ga nna lefifi mo lefatsheng lotlhe go ya nakong ya boraro thapama,

⁴⁵ letsatsi la fifala; lesire la Tempele la gagoga ka bogare.

⁴⁶ Foo Jesu a goa ka lentswe le legolo a re: “Rara, ke neela mowa wa me mo diatleng tsa gago!” Ya re a sena go bua jalo, a ntsha mowa.

⁴⁷ E rile molaodi-wa-lekgolo a bona se se dirafetseng, a galaletsa Modimo a re: “Ruri, motho yo e ne e le mosiami.”

⁴⁸ Mme batho botlhe ba ba neng ba phuthegetse go bona pono e, ya re ba bona tse di dirafetseng, ba itshôla, ba boa.

⁴⁹ Botlhe ba ba itsanyeng nae, le basadi ba ba neng ba mo setse morago ba tswa Galelea, ba ne ba emetse kgakala, ba lebile dilo tseo.

Phitlho

⁵⁰ Jaanong go ne go le monna mongwe, leina la gagwe e le Josefa yo e leng monna wa lekgotla, e le monna yo o molemo, yo o siameng

⁵¹ – ene o ne a sa dumelana le katlholo ya bona le tiro ya bona – e le wa Arimathea, motse wa Bajuta, yo o neng a letetse puso ya Modimo.

⁵² Yoo a ya kwa go Pilato, a kopa setoto sa ga Jesu.

⁵³ Ya re a sena go se pagolola, a se phuthela ka lesela le lesweu, a se baya mo lebitleng le le gabilweng mo lefikeng, le go iseng go ke go ladiwe ope mo go lone.

⁵⁴ E ne e le letsatsi la Iketleetso, mme Sabata o ne a atametse.

⁵⁵ Basadi ba ba neng ba dule nae kwa Galelea, ba bo ba mo setse morago, ba bona phupu le ka fa serepa sa gagwe se laditsweng ka teng.

⁵⁶ Ya re ba sena go boa, ba baakanya makga le ditlolo; mme ba ikhutsa ka Sabata ka fa molaong.