Luke 2 - Setswana 1970

Botsalo jwa ga Jesu Keresete

¹ E rile mo malatsing ao ga tswa taolo kwa go Kaisara Auguseto gore lefatshe lotlhe le kwalwe.

² Go kwalwa moo ga ntlha go dirilwe fa Kirenio a le molaodi wa Siria.

³ Botlhe ba ya go kwalwa, mongwe le mongwe a ya kwa motseng wa ga gabo.

⁴ Josefa le ene a tswa kwa Galelea mo motseng wa Nasaretha, a tlhatlogela kwa Jutea kwa motseng wa ga Dafita o o bidiwang Betleheme, ka a le wa kgotla yoora Dafita;

⁵ a ya go kwalwa le Maria, mosadi yo a mmeeletseng, a le moimana.

⁶ Ya re ba le koo, ga fitlha malatsi a o tla belegang ka ona,

⁷ a ba a belega morwawe wa ntlha, a mo phutha ka masela, a mo latsa mo segopong sa dipitse; ka gonne ba ne ba se na bonno mo ntlong ya baeti.

Badisa ba kwa Betleheme

⁸ Go ne go le badisa mo lefatsheng leo, ba le kwa nageng, ba tlhokometse letsomane la bone bosigo.

⁹ Mme moengele wa Morena a ema fa go bone, le kgalalelo ya Morena ya bonega dintlheng tsotlhe tsa bone; mme ba boifa ka poifo e kgolo.

¹⁰ Moengele a ba raya a re: “Se boifeng; gonne bonang, ke lo tsiseditse mafoko a a molemo a boitumelo jo bogolo jo e tla nnang jwa batho botlhe;

¹¹ ka gonne gompieno lo tsaletswe Mogolodi mo motseng wa ga Dafita, yo e leng Keresete Morena.

¹² “Mme se e tla nnang sesupo mo go lona ke se: Lo tla fitlhela lesea le phuthilwe ka masela, le letse mo segopong sa dipitse.”

¹³ Ka tshoganyetso bontsi jwa masomo a legodimo jwa nna le moengele, jwa baka Modimo jwa re:

¹⁴ “Tlotlo a e nne ya Modimo kwa magodimong le kagiso mo lefatsheng mo bathong ba o ba itumelelang.”

¹⁵ Ya re baengele ba sena go ba tlogela ba ya legodimong, badisa ba raana ba re: “A re yeng tlhe kwa Betleheme, re bone selo se, se se dirafetseng, se Morena o se re itsisitseng.”

¹⁶ Ba ya ka bonako, ba fitlhela Maria le Josefa le lesea le letse mo segopong sa dipitse.

¹⁷ Ya re ba sena go bona, ba bega lefoko le ba le boleletsweng ka ga ngwana yo.

¹⁸ Mme botlhe ba ba utlwang ba gakgamalela tse ba di boleletsweng ke badisa.

¹⁹ Maria a boloka dipolelo tsotlhe tseo, a di akanya mo pelong ya gagwe.

²⁰ Jaanong badisa ba boa, ba galaletsa Modimo, ba o boka ka ntlha ya tsotlhe tse ba di utlwileng le tse ba di bonyeng, fela jaaka ba ne ba boleletswe.

Thupiso ya ga Jesu le go supiwa ga gagwe

²¹ E rile malatsi a a robedi a sena go feta a gore ngwana a rupisiwe, leina la gagwe la bidiwa Jesu, le a le teilweng ke moengele, a ise a ithwalwe.

²² Ya re malatsi a phepafatso ya gagwe a sena go feta ka fa molaong wa ga Moše, ba mo isa kwa Jerusalema go mo supa fa pele ga Morena,

²³ fela jaaka go kwadilwe mo molaong wa Morena ga twe: “Mosimane mongwe le mongwe wa maitibolo o tla bidiwa moitshepi wa Morena.”

²⁴ Ba ya go ntsha setlhabelo ka fa go builweng mo molaong wa Morena ka teng, e bong sa maphoi a le mabedi, gongwe maebana a le mabedi.

Simeone le Hana

²⁵ Go ne go le motho mo Jerusalema yo leina la gagwe e leng Simeone; motho yoo a bo a siame, e le mmoifa-Modimo, a lebeletse kgomotso ya Iseraele, mme Mowa o o Boitshepo o le mo go ene.

²⁶ O kile a senolelwa ke Mowa o o Boitshepo gore ga a nke a bona loso, a ise a bone Motlodiwa wa Morena.

²⁷ A isiwa ke Mowa kwa Tempeleng. Ya re batsadi ba tsisa ngwana Jesu go mo direla ka fa mokgweng wa molao,

²⁸ a mo tshola ka mabogo, a boka Modimo a re:

²⁹ “Morena, jaanong o naya motlhanka wa gago tsela, ka fa lefokong la gago, go ya ka kagiso;

³⁰ ka gonne matlho a me a bonye pholoso ya gago

³¹ e o e etleeditseng mo matlhong a merafe yotlhe,

³² e bong lesedi le le tla senogelang baheitane le go galaletsa morafe wa gago wa Iseraele.”

³³ Mme rraagwe le mmaagwe ba gakgamalela dilo tse di buiwang ka ga gagwe.

³⁴ Jaanong Simeone a ba tshegofatsa, a raya Maria mmaagwe a re: “Bona, ngwana yo o beetswe go wa le go tsoga ga ba bantsi mo go Iseraele, le go nna sesupo se se ganediwang.

³⁵ Le wena ka wesi lerumo le tla phunyeletsa mowa wa gago, gore megopolo ya dipelo tse dintsi e senolwe.”

³⁶ Le gona ga bo go le Hana moporofeti, morwadia Fanuele, wa lotso lwa ga Asere; yoo a bo a tsofetse thata, mme o ne a phedile le monna wa gagwe dinyaga tse di supang go tloga mo bokgarebeng jwa gagwe.

³⁷ E ne e le motlholagadi yo o ka nnang dinyaga di le 84, yo o sa tlogeng mo Tempeleng, a direla Modimo ka go itima dijo le ka merapelo bosigo le motshegare.

³⁸ Yoo a tla ka yona nako eo, a leboga Modimo, a bua ka ga gagwe le botlhe ba ba lebeletseng kgololo ya Jerusalema.

Ba boela kwa Nasaretha

³⁹ Ya re ba sena go swetsa tsotlhe ka fa molaong wa Morena, ba boela kwa Galelea kwa motseng wa ga bone wa Nasaretha.

⁴⁰ Ngwana ene a gola, a tia, a tlala botlhale, mme tshegofatso ya Modimo e ne e le mo go ene.

Jesu mo Tempeleng

⁴¹ Jaanong bagolo ba gagwe ba ne ba tle ba ye kwa Jerusalema ka dinyaga tsotlhe kwa moletlong wa Tlolaganyo.

⁴² E rile a le dinyaga di le 12, ba tlhatlogela kwa Jerusalema ka fa tlwaelong ya moletlo.

⁴³ Ya re ba boa ba sena go swetsa malatsi, ngwana Jesu a sala mo Jerusalema, bagolo ba gagwe ba sa itse.

⁴⁴ Mme ka ba gopotse gore o mo lesomong la baeti, ba tsamaya leeto la letsatsi, ba mmatla mo go ba ga bone le mo go ba ba itsanyeng nabo.

⁴⁵ Ya re ba sa mmone, ba boela kwa Jerusalema, ba ntse ba mmatla.

⁴⁶ Ya re malatsi a le mararo a sena go feta, ba mo fitlhela mo Tempeleng, a ntse mo gare ga baruti, a ba reeditse, a bile a ba botsolotsa.

⁴⁷ Botlhe ba ba mo utlwang ba gakgamalela tlhaloganyo le dikarabo tsa gagwe.

⁴⁸ Ya re ba mmona, ba gamarega. Mme mmaagwe a mo raya a re: “Ngwanaka, o ne o re direlelang jalo? Bona, rraago le nna re go batlile ka bohutsana.”

⁴⁹ A ba raya a re: “Lo ne lo mpatlelang? A lo ne lo sa itse gore ke tshwanetse go nna mo go tse e leng tsa ga Rre?”

⁵⁰ Mme ba se ka ba tlhaloganya lefoko le a le buang nabo.

⁵¹ Mme a tsamaya nabo, a fitlha mo Nasaretha, a ba utlwa; mmaagwe a boloka mafoko aotlhe ao mo pelong.

⁵² Jesu a tota mo go tlhalefeng le mo bogolong le mo go ratweng ke Modimo le batho.