Luke 12 - Setswana 1970

Ka ga boitimokanyo

¹ E rile go sa le jalo, diketekete tsa batho di sena go phuthega, mo ba bileng ba gatana dinao, a simolola go bua pele le barutwa ba gagwe a re: “Itiseng mo matlhabegong a Bafarisai, a e leng boitimokanyo.

² Ga go na sepe se se bipilweng, se se se kitlang se senolwa, le fa e le se se fitlhegileng, se se se kitlang se itsiwe.

³ Ka moo, tsotlhe tse lo di buileng mo lefifing di tla utlwala mo leseding, le se lo se sebileng ditsebeng mo matlwaneng a a kwa teng se tla phatlaladiwa mo godimo ga matlo.

Yo o tshwanetseng go boifiwa

⁴ “Mme lona ditsala tsa me, ke lo raya ke re: Se boifeng ba ba bolayang mmele, mme morago ba se na sepe se ba ka se dirang bogolo go moo.

⁵ Mme ke tla lo supetsa yo lo tshwanetseng go mmoifa: Boifang ene yo e a reng a sena go bolaya, a bo a na le thata go latlhela mo moleteng wa molelo. Ee, ke lo raya ke re: Boifang ene.

⁶ “A dirobele di le tlhano ga di rekwe ka madinyana a le mabedi? Mme ga go sepe sa tsona se se ka lebalwang fa pele ga Modimo.

⁷ Le tsona dithiri tsa ditlhogo tsa lona di badilwe tsotlhe. Se boifeng; gonne lo gaisa dirobele di le dintsi.

Ka ga go ipolela Morena le go mo itatola

⁸ “Ke lo raya ke re: Mongwe le mongwe yo o impolelang fa pele ga batho, Morwa-Motho le ene o tla mo ipolela fa pele ga baengele ba Modimo.

⁹ Mme yo o intatolang fa pele ga batho, o tla itatolwa fa pele ga baengele ba Modimo.

¹⁰ “Mongwe le mongwe yo o tla buang lefoko le le nyefolang Morwa-Motho, o ka itshwarelwa; mme yo o ka kgalang Mowa o o Boitshepo, ga a ka ke a itshwarelwa.

¹¹ “E re fa ba lo isa fa pele ga disenagoge le mebuso le balaodi, lo se ka lwa itshwenya gore lo tla ikarabela jang, gongwe ka eng, le fa e le gore lo tla bua eng;

¹² gonne Mowa o o Boitshepo o tla lo ruta ka nako eo tse lo tshwanetseng go di bua.”

Setshwantsho sa mohumi wa lesilo

¹³ Ke fa mongwe mo bontsing a mo raya a re: “Moruti, raya morwa-rre gore a kgaogane boswa le nna.”

¹⁴ Mme Jesu a mo raya a re: “Motho ke wena, ke mang yo o mpeileng go nna moatlhodi gongwe mokgaoganyi wa boswa jwa lona?”

¹⁵ A boa a ba raya a re: “Elang tlhoko, lo itise mo megagarung yotlhe; gonne le fa mongwe a na le letlotlo, ga a bone bophelo ka tse a nang natso.”

¹⁶ A ba a bua nabo ka setshwantsho a re: “Masimo a motho mongwe wa mohumi a ne a ungwa thata.

¹⁷ Mme a ikakanya a re: ‘Ke tla dira eng, ka ke se na mo nka bolokelang thobo ya me teng?’

¹⁸ A ikaraba a re: ‘Ke tla dira jaana: Ke tla rutla difala tsa me, ke aga tse dikgolo, ke bolokela mabele aotlhe le dikhumo tsa me teng,

¹⁹ jaanong ke raya mowa wa me ke re: Mowa wa me, o na le dikhumo tse dintsi tse di lekanyeng dinyaga tse dintsi. Ikhutse, o je, o nwe, o ipele.’

²⁰ Mme Modimo wa mo raya wa re: ‘Lesilo ke wena! Mowa wa gago o tla tlosiwa mo go wena mo bosigong jono; mme dilo tse o di kgobokantseng e tla nna tsa ga mang?’

²¹ “Yo o iphuthelang matlotlo, mme a sa huma ka fa Modimong, o ntse jalo.”

Ditshwenyego tsa bophelo

²² Jaanong a raya barutwa ba gagwe a re: “Ke ka moo ke lo rayang ke re: Se tshwenyegeleng bophelo gore lo tla ja eng, le fa e le mmele gore lo tla apara eng.

²³ Gonne bophelo bo gaisa dijo, le mmele o gaisa diaparo.

²⁴ Elang magakabe tlhoko; ka gonne ga a jwale, ga a robe; le gona ga a na sefala, le fa e le ntlo ya polokelo, mme Modimo o a a otla. Lona lo gaisa dinonyane segolo jang!

²⁵ Ke ofe wa lona yo o ka ikoketsang boleele jwa letsogo le le lengwe fela ka go itlhofaetsa?

²⁶ Jaanong fa le se sennyennyane se lo palela, lo itshwenyetsang ka tse dingwe?

²⁷ Elang madutla tlhoko ka fa a golang ka teng; ga a otlhe, ga a loge; mme ke lo raya ke re: Le fa e le Salomo mo kgalalelong yotlhe ya gagwe, o ne a sa apare jaaka lengwe la ona.

²⁸ Mme fa Modimo o apesa jalo bojang jo bo mo nageng, jo bo leng teng gompieno, mme kamoso bo latlhelwa mo pesetsong, o tla lo apesa bogolo jang, ba tumelo e potlana ke lona!

²⁹ “Se batleng se lo tla se jang le se lo tla se nwang, le gona lo se ka lwa di tlhofaelela.

³⁰ Gonne dilo tsotlhe tse di batlwa ke merafe ya lefatshe; mme Rraeno o itse gore di batlega mo go lona.

³¹ Bogolo batlang puso ya gagwe, mme dilo tsotlhe tse lo tla di okelediwa.

Lohumo lwa nnete

³² “Se boifeng, letsomanenyana; gonne go natefetse Rraeno go lo naya puso.

³³ Rekisang tse lo nang natso, lo ntshe dikatso. Itireleng dikgwama tse di sa onaleng, e bong lohumo lo lo sa feleng kwa magodimong, kwa legodu le sa atameleng teng le kwa motoutwana o sa senyeng teng;

³⁴ gonne kwa lohumo lwa lona lo leng teng, dipelo tsa lona le tsona di tla nna teng.

Setshwantsho sa motlhanka yo o bobebe

³⁵ “A matheka a lona a nne a tlamilwe, le dipone tsa lona di tuke.

³⁶ Lo nne jaaka batho ba ba lebeletseng morena wa bone, fa a tla boa kwa modirong wa nyalo, gore e re a tla a konyakonya, ba akofe ba mmulele.

³⁷ Go sego batlhanka bao ba e tla reng morena wa bone a tla, a ba fitlhele ba disitse. Ammaaruri ke lo raya ke re: O tla itlama, a ba nnisa fa dijong, a ba a tla, a ba tsholela.

³⁸ Mme fa e ka re a tla ka tebelo ya bobedi, le fa e le ka ya boraro, a ba fitlhela jalo, ba tla nna sego batlhanka bao.

³⁹ Kana fa mong wa ntlo a ka bo a itsile gore legodu le tla tla ka nako efe, o ka bo a disitse, a se ka a leseletsa ntlo ya gagwe go phunngwa.

⁴⁰ Le lona, nnang lo iketleeditse; gonne Morwa-Motho o tla tla ka nako e lo sa e gopolang.”

Molebeledi yo o ikanyegang

⁴¹ Ke fa Petoro a mo raya a re: “Morena, setshwantsho se a o se bolelela rona fela, gongwe botlhe?”

⁴² Morena a re: “Kana molebeledi yo o ikanyegang, yo o botlhale ke mang, yo morena wa gagwe o tla mo laodisang badiredi ba gagwe gore a ba abele dijo ka nako tsa teng?

⁴³ Go sego motlhanka yoo, yo e tla reng morena wa gagwe a tla, a mo fitlhele a dira jalo.

⁴⁴ Ammaaruri ke lo raya ke re: O tla mo laodisa tsotlhe tse o nang natso.

⁴⁵ Mme fa motlhanka yoo a ka ithaya a re: ‘Morena wa me o diega go tla,’ mme a simolola go betsa batlhanka le malata, le go ja le go nwa le go tagwa,

⁴⁶ morena wa motlhanka yoo o tla tla ka letsatsi le o sa mo lebelelang ka lone, le ka nako e o sa e itseng, mme o tla mo gagoganya, a mo naya kabelo ya gagwe le ba ba sa ikanyegeng.

⁴⁷ “Motlhanka yo o itsileng thato ya morena wa gagwe, mme a se ka a baakanya sepe, le fa e le go dira ka fa thatong ya gagwe, o tla bediwa thata.

⁴⁸ Mme yo o se kang a itse, mme a dira tse di tshwanetseng kotlo, o tla bediwa go le gonnye. Mongwe le mongwe yo o neetsweng tse dintsi, go tla batlwa tse dintsi mo go ene; yo o filweng taolo mo go tse dintsi, go tla batlwa tse di fetisang mo go ene.

Jesu o tsisa molelo le kgaoganyo

⁴⁹ “Ke tsile go latlhela molelo mo lefatsheng; mme ke eletsa jang, fa o ka bo o setse o tshubilwe.

⁵⁰ Mme ke na le kolobetso e ke tla kolobediwang ka yona; mme ke tlaletswe jang go tsamae e dirafale!

⁵¹ A lo itlhoma gore ke tsile go dira kagiso mo lefatsheng? Ke lo raya ke re: Nnyaya, mme bogolo kgaogano:

⁵² gonne go tloga jaanong go tla nna ba le batlhano mo ntlong e le nngwe fela ba kgaoganye, ba bararo ba ganetsanya le ba babedi, ba babedi ba ganetsanya le ba bararo.

⁵³ Ba tla nna ba kgaoganye, rra-motho a ganetsa morwawe, morwa a ganetsa rraagwe; mma-motho a ganetsa morwadie, morwadi a ganetsa mmaagwe; matsalaa-motho a ganetsa ngwetsi wa gagwe, ngwetsi a ganetsa matsalaagwe.”

Ditshupo tsa dipaka

⁵⁴ A boa a raya batho a re: “E a tle e re lo bona leru le tlhatloga kwa bophirimatsatsi, lo akofe lo re: ‘Go tla tla mookodi,’ mme go dirafale jalo.

⁵⁵ Mme e re phefo ya borwa e foka, lo re: ‘Go tla nna mogote,’ mme go nne jalo.

⁵⁶ Baitimokanyi ke lona! Ponalo ya lefatshe le ya legodimo lo itse go e lemoga; mme go ntse jang, fa lo sa lemoge sebaka seno?

Ithuanye le moganetsi wa gago

⁵⁷ “Gape, ke go reng, fa lo sa ikatlholele ka losi se e leng tshiamo?

⁵⁸ Fa o ya kwa kgosaneng, o na le moganetsi wa gago, o dire matsapa go ithuanya nae, o sa le mo tseleng, e se re gongwe a go gogela kwa moatlhoding, mme moatlhodi a go neela motlhanka, mme motlhanka a go latlhela mo ntlong ya kgolegelo.

⁵⁹ Ke go raya ke re: Ga o nke o tswa teng ka gope, o ise o lefe le lone ledinyana la bofelo.”