Luke 1 - Setswana 1970

Keteletsopele

¹ Batho ba le bantsi ba setse ba dirile letsapa la go kwala ka thulaganyo polelo ya tse di dirafetseng mo go rona, tse di tlhomameng,

² fela jaaka re di neilwe ke ba ba di bonyeng ka matlho go tswa kwa tshimologong, mme ba nna badiredi ba Lefoko.

³ Le nna, ya re ke sena go tlhotlhomisa tsotlhe ka botlalo go tswa tshimologong, ka gopola gore go ka nna molemo go di go kwalela ka thulaganyo, wena Theofilo yo o tlotlegang segolo,

⁴ gore ò tle ò itse boikanyego jwa mafoko a ò a rutilweng.

Kitsiso ya botsalo jwa ga Johane

⁵ Mo malatsing a ga Herote, kgosi ya Jutea, go ne go le moperesiti mongwe yo leina la gagwe e leng Sagaria, wa lesomo la ga Abia; mosadi wa gagwe e ne e le wa bomorwadia Arone, leina la gagwe e le Elisabete.

⁶ Ba bo ba siame fa pele ga Modimo ka bobedi jwa bone, ba tsamaya mo ditaolong tsotlhe le mo ditaong tsa Morena, ba se na molato.

⁷ Mme ba bo ba se na ngwana, ka Elisabete e le moopa, ba bile ba setse ba tsofetse ka bobedi jwa bone.

⁸ Ya re a dira tiro ya boperesiti fa pele ga Modimo ka fa thulaganyong ya lesomo la gagwe,

⁹ a tshwarwa ke tengwa ka fa tlwaelong ya boperesiti go tsena mo Tempeleng ya Morena gore a tshube maswalo.

¹⁰ Mme phuthego yotlhe ya batho ya bo e rapela, e le ka fa ntle ka nako ya go tshuba maswalo.

¹¹ Ke fa go bonala fa go ene moengele wa Morena, a eme ka fa ntlheng ya le le jang ya aletare ya maswalo.

¹² Ya re Sagaria a mmona, a rerega, mme poifo ya mo wela.

¹³ Moengele a mo raya a re: “Sagaria, ò se ka wa boifa; gonne thapelo ya gago e utlwilwe. Elisabete, mosadi wa gago, o tla go belegela ngwana wa mosimane, mme ò bitse leina la gagwe Johane.

¹⁴ O tla nna le boitumelo le boipelo; mme ba bantsi ba tla itumelela go tsalwa ga gagwe;

¹⁵ ka gonne o tla nna mogolo fa pele ga Morena. Ga a nke a nwa weine, le fa e le seno se se tagang, mme o tla tlala Mowa o o Boitshepo go tloga sebopelong sa ga mmaagwe.

¹⁶ Ba bantsi ba bomorwa Iseraele o tla ba sokololela go Morena, Modimo wa bone.

¹⁷ O tla mo etelela pele mo moweng le mo thateng ya ga Elia go sokololela dipelo tsa borra-bana mo baneng, le ba ba sa utlweng go ba sokololela mo maikutlong a basiami, go baakanyetsa Morena setšhaba se se etleeditseng.”

¹⁸ Sagaria a raya moengele a re: “Seo ke tla se lemoga ka eng? Gonne ke monna mogolo, le mosadi wa me o tsofetse.”

¹⁹ Moengele a mo araba a re: “Ke nna Gaberiele yo ke emeng fa pele ga Modimo; mme ke romilwe go bua nao le go go bolelela mafoko ao a boitumelo.

²⁰ Mme bona, o tla nna semumu, o retelelwa ke go bua go fitlha mo letsatsing le dilo tseo di tla dirafalang ka lone, ka o sa dumela mafoko a me a a tla dirafadiwang ka sebaka sa ona.”

²¹ Mme batho ba bo ba lebeletse Sagaria, jaanong ba gakgamalela tiego ya gagwe mo Tempeleng.

²² Ya re a tswa, a retelelwa ke go bua nabo; ba lemoga gore o bonye pontsho mo Tempeleng. Mme a nna a ba gwetlha, a fela a le semumu.

²³ Ya re malatsi a tirelo ya gagwe a sena go feta, a ya kwa gae.

²⁴ E rile morago ga malatsi ao, Elisabete, mosadi wa gagwe, a ithwala, a ba a iphitlha dikgwedi tse tlhano a re:

²⁵ “Morena o ntiretse jalo mo malatsing a o nkgopotseng ka ona go ntlosa kgobo mo bathong.”

Kitsiso ya botsalo jwa ga Jesu

²⁶ E rile ka kgwedi ya borataro moengele Gaberiele a rongwa ke Modimo kwa motseng wa Galelea o leina la ona e leng Nasaretha,

²⁷ kwa lekgarebeng le le beeletsweng ke monna yo leina la gagwe e leng Josefa, wa kgotla yoora Dafita, leina la lekgarebe e le Maria.

²⁸ Ya re moengele a tsena kwa go ene, a mo raya a re: “Dumela, yo o tlhogonolofaditsweng, Morena o na nao; o tshegofaditswe mo basading.”

²⁹ Ya re a mmona, a rerega thata ka lefoko leo, a akanya tumediso eo gore ke e ntseng jang.

³⁰ Moengele a mo raya a re: “Maria, ò se ka wa boifa; gonne ò bonye bopelotlhomogi mo Modimong.

³¹ Reetsa: O tla ithwala, ò belega ngwana wa mosimane, leina la gagwe ò le bitse Jesu.

³² Ene yoo o tla nna mogolo, a bidiwa Morwa Mogodimodimo. Morena Modimo o tla mo naya sedulo sa bogosi sa ga Dafita rraagwe.

³³ O tla nna kgosi mo ntlong ya ga Jakobe ka bosakhutleng; bogosi jwa gagwe ga bo nke bo nna le bokhutlo.”

³⁴ Maria a raya moengele a re: “Seo se tla dirafala jang, ka ke sa itse monna?”

³⁵ Moengele a mo araba a re: “Mowa o o Boitshepo o tla tla mo go wena, le thata ya Mogodimodimo e tla go ritifalela; mme ka ntlha ya moo ngwana yo o boitshepo yo o tla belegwang ke wena o tla bidiwa Morwa Modimo.

³⁶ Bona, Elisabete wa ga eno le ene o ithwele ngwana wa mosimane mo botsofeng jwa gagwe; kgwedi eno ke ya borataro ya gagwe, ene yo o neng a bidiwa moopa.

³⁷ Gonne ga go na sepe se se ka palelang Modimo.”

³⁸ Foo Maria a re: “Bona, ke lelata la Morena; a go ntirafalele ka fa lefokong la gago.” Jaanong moengele a mo tlogela.

Maria o etela Elisabete

³⁹ Mo malatsing ao Maria a nanoga, a ya ka potlako kwa lefatsheng la makgabana, kwa motseng mongwe wa Juta,

⁴⁰ a feta a tsena mo ntlong ya ga Sagaria, a dumedisa Elisabete.

⁴¹ Ya re Elisabete a utlwa tumediso ya ga Maria, ngwana a tlola mo mpeng ya gagwe. Mme Elisabete a tlala Mowa o o Boitshepo,

⁴² a tlhatlosa lentswe a re: “O tshegofaditswe mo basading, go bile go tshegofaditswe leungo la mmele wa gago.

⁴³ Seo se ntswela kae, fa mma Morena wa me a ka tla kwano go nna?

⁴⁴ Gonne bona, e rile lentswe la tumediso ya gago le tsena mo ditsebeng tsa me, ngwana a tlola ka boipelo mo mpeng ya me.

⁴⁵ Mme go sego yo o dumetseng, ka gonne tse ò di boleletsweng ke Morena di tla dirafala.”

Poko ya ga Maria

⁴⁶ Maria a re: “Pelo ya me e godisa Morena,

⁴⁷ mowa wa me o ipelela Modimo, Mopholosi wa me.

⁴⁸ Gonne o ne a leba bobotlana jwa lelata la gagwe. Bona, go tloga jaanong ditshika tsotlhe di tla mpitsa yo o sego;

⁴⁹ ka gonne Yo-o-thata o ntiretse tse dikgolo; leina la gagwe le boitshepo.

⁵⁰ Boutlwelo-botlhoko jwa gagwe bo mo go ba ba mmoifang mo ditshikatshikeng.

⁵¹ O dirile ka thata ya letsogo la gagwe; a falatsa ba ba ikgodisang mo kakanyong ya dipelo tsa bone.

⁵² O digile dikgosi tse di thata mo ditulong tsa tsona tsa bogosi; a godisa ba babotlana.

⁵³ Ba ba tshwerweng ke tlala o ba kgorisitse tse di molemo; mme bahumi a ba tsamaisa ba iphotlhere.

⁵⁴ O thusitse Iseraele, motlhanka wa gagwe, a gopola boutlwelo-botlhoko,

⁵⁵ fela jaaka a buile le borraetsho, e leng Aborahame le losika lwa gagwe ka bosakhutleng.”

⁵⁶ Mme Maria a nna nae, e ka nna dikgwedi tse tharo, a ba a boela kwa gae.

Botsalo jwa ga Johane

⁵⁷ Jaanong lobaka lwa ga Elisabete lwa go belega lwa fitlha, mme a belega ngwana wa mosimane.

⁵⁸ E rile baaga-mmogo le ba ga gabo ba utlwa gore Morena o mo godiseditse boutlwelo-botlhoko jwa gagwe, ba itumela nae.

⁵⁹ Ya re ka letsatsi la robobedi ba tla go rupisa ngwana, mme ba re ba mmitsa Sagaria ka leina la ga rraagwe.

⁶⁰ Mme mmaagwe a araba a re: “E seng jalo! O tla bidiwa Johane.”

⁶¹ Ba mo raya ba re: “Ga go na ope mo go ba ga eno yo o bidiwang ka leina leo.”

⁶² Ba gwetlha rraagwe, ba mmotsa gore o rata ngwana a bidiwe mang?

⁶³ Ya re a sena go lopa letlapa, a kwala a re: “Leina la gagwe ke Johane.” Mme ba gakgamala botlhe.

⁶⁴ Foo molomo wa gagwe wa bulega ka bonako, le loleme lwa gagwe lwa funologa, a ba a bua, a baka Modimo.

⁶⁵ Poifo ya wela botlhe ba ba agileng tikologong ya bone; dikgang tsotlhe tseo tsa bolelwa mo lefatsheng lotlhe la makgabana la Jutea.

⁶⁶ Botlhe ba ba di utlwang ba di tshola ka pelo ba re: “Kana ngwana yo, o tla nna eng?” Gonne letsogo la Morena le ne le na nae.

Poko ya ga Sagaria

⁶⁷ Jaanong Sagaria rraagwe a tlala Mowa o o Boitshepo, a bua ka ona a re:

⁶⁸ “A go bakwe Morena, Modimo wa Iseraele; gonne o lekotse morafe wa ona, wa o direla kgololo.

⁶⁹ O re emiseditse lonaka lwa pholoso mo ntlong ya ga Dafita, motlhanka wa ona,

⁷⁰ jaaka o buile ka melomo ya baporofeti ba ona ba ba boitshepo go tswa metlheng ya bogologolo

⁷¹ wa re: O tla re namolela mo babeng ba rona, le mo mabogong a botlhe ba ba re tlhoileng,

⁷² gore o direle borraetsho boutlwelo-botlhoko, o be o gopole kgolagano e e boitshepo ya ona,

⁷³ e bong ikano e o e ikanetseng Aborahame rraetsho,

⁷⁴ go re naya gore e re re golotswe mo mabogong a baba ba rona, re o direle re se na poifo,

⁷⁵ re le mo boitshepong le mo tshiamong fa pele ga ona ka malatsi otlhe a rona.

⁷⁶ Mme le wena, ngwana, o tla bidiwa moporofeti wa Mogodimodimo; gonne o tla etelela Morena pele go baakanya ditsela tsa gagwe,

⁷⁷ go naya morafe wa gagwe kitso ya pholoso ka go itshwarelwa dibe tsa ona,

⁷⁸ ka ntlha ya boutlwelo-botlhoko jo bo boteng jwa Modimo wa rona, jo tlhabo ya lesedi e e tswang kwa godimo e tla re lekolang ka jona,

⁷⁹ go sedimosetsa ba ba ntseng mo lefifing le mo moriting wa loso, go siamisetsa dinao tsa rona mo tseleng ya kagiso.”

⁸⁰ Mme ngwana a gola, a tia mo moweng; a ba a nna mo dikakeng go fitlha mo letsatsing la go ipontsha mo go Iseraele.