Lipesalema 97 - Setswana 1970

Go busa Morena

¹ Morena ke kgosi; a lefatshe le duduetse; a ditlhakatlhake tse dintsi di itumele.

² Maru le lefifi di mo dikanyeditse; tshiamo le molao ke mothao wa sedulo sa gagwe sa bogosi.

³ Molelo o mo eteletse pele; o nyeletsa baba ba gagwe tikologong.

⁴ Dikgadima tsa gagwe di bonesa lefatshe; lefatshe le a di bona, e bile le a roroma.

⁵ Dithaba di gakologa fa pele ga Morena jaaka mmotu wa dinotshe, fa pele ga Morena wa lefatshe lotlhe.

⁶ Magodimo a bolela tshiamo ya gagwe le batho botlhe ba bona kgalalelo ya gagwe.

⁷ A ba tlhajwe ke ditlhong botlhe ba ba direlang ditshwantsho, ba ba ipokang ka medimo e e seng yona. Medimo yotlhe e a mo obamela.

⁸ Sione o a utlwa, o a itumela; bomorwadia Juta ba ipelela dikatlholo tsa gago, Morena.

⁹ Gonne wena Morena o Mogodimodimo yo o okameng lefatshe lotlhe; o mogolo bogolo go medimo yotlhe.

¹⁰ Ba lo ratang Morena, tlhoang bosula; o boloka mewa ya badumedi ba gagwe, o ba pholosa mo diatleng tsa baikepi.

¹¹ Lesedi le tlhabetse mosiami, le boitumelo bo bonaletse ba ba dipelo di thokgameng.

¹² Lona basiami, itumeleleng Morena, lo bake leina la gagwe le le boitshepo.