Lipesalema 96 - Setswana 1970

Opelelang moatlhodi, o e tla

¹ Opelelang Morena sefela se sešwa; opelelang Morena, lona mafatshe otlhe!

² Opelelang Morena, lo bake leina la gagwe, utlwatsang pholoso ya gagwe ka letsatsi lengwe le lengwe!

³ Bolelang kgalalelo ya gagwe mo merafeng le dikgakgamatso tsa gagwe mo bathong botlhe!

⁴ Gonne Morena o mogolo, pako e kgolo e mo tshwanetse; o boitshega bogolo go medimo yotlhe.

⁵ Gonne medimo yotlhe ya merafe ga se ya sepe; mme Morena o dirile magodimo.

⁶ Borena le kgalalelo di fa pele ga gagwe; thata le bontle di mo Felong ga gagwe ga Boitshepo.

⁷ Ntshetsang Morena, lona ditso tsa merafe, ntshetsang Morena kgalalelo le thata!

⁸ Ntshetsang Morena kgalalelo ya leina la gagwe, tlisang ditshupelo, lo tsene mo malapeng a gagwe!

⁹ Obamelang Morena ka mokgabo o o boitshepo; roromang fa pele ga sefatlhego sa gagwe, lona mafatshe aotlhe!

¹⁰ Buang mo merafeng lo re: “Morena ke kgosi; o thaile lefatshe gore le se tshikinyege; o tla atlhola batho ka tshiamo.”

¹¹ A magodimo a itumele, a lefatshe le duduetse, a lewatle le gwase le tse di tletseng mo go lone.

¹² A naga e ipele le tsotlhe tse di mo go yona; ke gona ditlhare tsotlhe tsa sekgwa di tla duduetsang fa pele ga Morena;

¹³ gonne o e tla, o tsile go atlhola lefatshe; o tla atlhola lefatshe ka tshiamo le batho ka boammaaruri jwa gagwe.