Lipesalema 95 - Setswana 1970

Tlhotlheletso ya go dudueletsa Modimo

¹ Tlayang a re dudueletseng Morena, re ipeleleng lefika la pholoso ya rona.

² A re tleng fa pele ga sefatlhego sa gagwe ka malebogo, re mo ipeleleng ka dikopelo tsa pako.

³ Gonne Morena ke Modimo o mogolo, ke kgosi e kgolo, mmusi wa medimo yotlhe,

⁴ yo mateng a lefatshe a leng mo seatleng sa gagwe, yo ditlhoa tsa dithaba e leng tsa gagwe;

⁵ yo lewatle e leng la gagwe, o le tlhodile; le lefatshe le le omileng ke la gagwe, diatla tsa gagwe di le bopile.

⁶ Tlayang a re obameleng, re iname, re khubame fa pele ga Morena, Mmopi wa rona.

⁷ Gonne ke ene Modimo wa rona; rona re batho ba bofulo jwa gagwe le dinku tsa seatla sa gagwe. E kete lo ka bo lo utlwa lentswe la gagwe kajeno!

⁸ “Se thatafatseng dipelo tsa lona jaaka kwa Meriba le ka letsatsi la Masa mo sekakeng,

⁹ kwa borraalona ba nthaetseng teng, ba nteka, etswe ba bonye ditiro tsa me.

¹⁰ Ke ne ka tenwa ke morafe oo dinyaga di le 40, ka bua ka re: ‘Batho ba, ke ba ba dipelo di timetseng, ga ba itse ditsela tsa me.’

¹¹ Ke gona ka moo ke ikanneng mo bogaleng jwa me ka re: ‘Ga ba nke ba tsena mo boikhutsong jwa me.’ ”