Lipesalema 94 - Setswana 1970

Thapelo ya go gololwa mo go ba ba patikang morafe wa Modimo

¹ Morena, Modimo wa pusoloso, Modimo wa pusoloso, iponatse!

² Nanoga, Moatlhodi wa lefatshe; busetsa baikgantshi ditiro tsa bona.

³ Baikepi ba tla tsaya sebaka se se kana kang, Morena? Baikepi ba tla duduetsa goleele go le kae?

⁴ Ba phoka lefulo, ba bua ka makgakga; badirabosula ba ikgantsha botlhe.

⁵ Morena, ba šobotla batho ba gago, ba patika boswa jwa gago.

⁶ Ba bolaya motlholagadi le moeng; ba gaila masiela,

⁷ ba re: “Morena ga a nke a bona; Modimo wa ga Jakobe ga o nke o lemoga.”

⁸ Lemogang, lona dieleele mo morafeng! Lona masilo, lo tla tlhalefa leng?

⁹ A ena yo o tlhomileng tsebe ga a ka ke a utlwa? A ena yo o bopileng leitlho ga a ka ke a bona?

¹⁰ A yo o layang ditšhaba ga a ka ke a di kgalemela, ena yo o rutang batho kitso?

¹¹ Morena o itse megopolo ya batho, fa e le ya lefela.

¹² Go sego motho yo wena, Morena, o mo watlhayang, o mo ruta molao wa gago

¹³ gore o tle o mo nee tapologo mo malatsing a tlalelo, go tsamaya moikepi a epelwe lemena.

¹⁴ Gonne Morena ga a nke a latlha batho ba gagwe; ga a nke a tlogela boswa jwa gagwe.

¹⁵ Katlholo e tla boela mo tshiamong; botlhe ba ba dipelo di tlhamaletseng ba tla e latela.

¹⁶ Ke mang yo o tla nkemelang mo basulatsing? Ke mang yo o tla mpuelelang mo go ba ba dirang bosula?

¹⁷ Fa e ka bo e se Morena yo o nthusang, mowa wa me o ka bo o setse o le gaufi le felo ga tidimalo.

¹⁸ E ne ya re fa ke re: “Lonao lwa me lo a theekela!” bopelotlhomogi jwa gago, Morena, bo ntshegetse.

¹⁹ Mo bontsing jwa matshwenyego a a mo teng ga me, dikgomotso tsa gago di itumedisa mowa wa me.

²⁰ A sedulo sa moatlhodi sa tshenyo se ka dumelana le wena, se se bopang bosula ka go sokamisa molao?

²¹ Ba ikopanyetsa bophelo jwa mosiami, ba sekisa madi a a se nang molato.

²² Mme Morena ke phemelo ya me; Modimo wa me e ntse e le lefika la botshabelo jwa me.

²³ O tla ba busolosetsa tshiamololo ya bona, a ba fedisa ka ntlha ya bosula jwa bona; Morena, Modimo wa rona, o tla ba nyeletsa.