Lipesalema 92 - Setswana 1970

Loboko lwa go baka tshiamo ya Modimo

¹ Pesalome. Sefela sa letsatsi la Sabata.

² Go monate go leboga Morena le go opelela leina la gago dipako, Mogodimodimo,

³ go bolela bopelotlhomogi jwa gago mo mosong le boikanyo jwa gago bosigo,

⁴ ka kwadi ya dithapo di le some le ka harepa le ka melodi ya segwana.

⁵ Gonne wena Morena o intumedisitse ka go dira ga gago; ke duduetsa ditiro tsa diatla tsa gago.

⁶ Ditiro tsa gago, Morena, di dikgolo jang! Dikakanyo tsa gago di botengteng.

⁷ Seeleele ga se di lemoge, lesilo ga le di tlhaloganye.

⁸ Fa baikepi ba gola sentle jaaka bojang, mme badirabosula botlhe ba kgaba jaaka dithunya, e a be e le gore ba nyelediwe ka bosakhutleng.

⁹ Mme wena Morena o Mogodimodimo ka bosakhutleng.

¹⁰ Gonne ruri, baba ba gago, Morena, ruri baba ba gago ba tla latlhega, basulatsi botlhe ba tla faladiwa.

¹¹ Lonaka lwa me o lo tsholetsa jaaka lwa nare, o ntloditse lookwane lo lošwa.

¹² Leitlho la me le tla leba baba ba me ka kgatlhego, ditsebe tsa me di tla utlwela tatlhego ya basenyi ba ba ntsogelang ka boitumelo.

¹³ Mosiami o tla tlhoga jaaka mokolane a gole jaaka setlhare sa mosetere wa Lebanone;

¹⁴ ba ba tlhomilweng mo Ntlong ya Morena ba tla tlhoga mo malapeng a Modimo wa rona.

¹⁵ Ba tla nna ba ungwa le mo botsofeng; ba tla nona, ba nna banana,

¹⁶ e le go bolela gore Morena ke wa nnete. Ke lefika la me; ga go tshiamololo epe mo go ena.