Lipesalema 91 - Setswana 1970

Mo phemelong ya Mogodimodimo

¹ Yo o ntseng mo tshireletsong ya Mogodimodimo, yo o leng mo moriting wa Mothatayotlhe,

² o tla raya Morena a re: “O botshabelo jwa me le kago ya phemelo ya me; o Modimo wa me o ke o ikanyang.”

³ Gonne ke ena yo o tla go gololang mo serung sa mothaisa-nonyane le mo leroborobong le le bolayang.

⁴ O tla go sireletsa ka diphuka tsa gagwe, ò femelega fa tlase ga tsona; boammaaruri jwa gagwe ke thebe le phemelo.

⁵ Ga o na go boifa poitshego ya bosigo, le e seng motsu o o fofang motshegare,

⁶ le e seng leroborobo le le tsamayang mo lefifing, le e seng kgogodi e e bolayang motshegare wa selebalo.

⁷ Le fa go ka wa ba le sekete ka fa lotlhakoreng lwa gago, gongwe ba le dikete di le some ka fa letsogong le le jang la gago, wena ga go nke go go ama.

⁸ O tla leba ka matlho fela, o bona baikepi ba bolawa ke se ba se jeleng.

⁹ Gonne o rile: “Wena Morena o botshabelo jwa me.” O dirile Mogodimodimo phemelo ya gago.

¹⁰ Ga o nke o welwa ke bosula bope, le boago jwa gago ga bo nke bo atamelwa ke sebetso.

¹¹ Gonne o tla go laelela baengele ba gagwe gore ba go boloke mo ditseleng tsotlhe tsa gago.

¹² Ba tla go kuka ka diatla gore dinao tsa gago di se kgopiwe ke lentswe.

¹³ O tla gata tau le lebolobolo, o gataka ledumedi le kgogela.

¹⁴ Ke tla mo pholosa, ka a nkgomaretse ka lorato, ke tla mo sireletsa, gonne o itse leina la me.

¹⁵ E tla re a mpitsa, ke mo utlwe, ke nne nae mo tlalelong; ke tla mo namola, ke mo tlotla.

¹⁶ Ke tla mo kgorisa bophelo jo boleele, ke mmontsha pholoso ya me.