Lipesalema 90 - Setswana 1970

KAROLO YA BONE, DIPESALOME 90 – 106 Bosengsepe jwa motho

¹ Thapelo ya ga Moše, monna wa Modimo. Morena, o ntse o le botshabelo jwa rona mo ditshikatshikeng.

² Pele dithaba di ise di tsalwe, o ise o tlhole lefatshe le lebopo, wena o ntse o le Modimo go tswa bosenang-tshimologo go ya bosakhutleng.

³ O busetsa batho loroleng lwa mmu wa re: “Boang, bana ba batho.”

⁴ Gonne dinyaga di le sekete, mo matlhong a gago di tshwana le letsatsi le le fetileng la maabane, di tshwana le tiso ya bosigo.

⁵ O ba gogotse jaaka ka morwalela; ba ntse jaaka ba robetse. Mo mosong ba nne jaaka bojang jo bo tlhogang,

⁶ jo bo thunyang mo mosong, bo gole, mme maitsiboa bo segwe, bo omelele.

⁷ Gonne re nyelela ka bogale jwa gago, re fediwa ka tshoganyetso ka kgakalo ya gago.

⁸ O beile melato ya rona fa pele ga gago, le maleo a rona a a fitlhegileng o a beile mo leseding la sefatlhego sa gago.

⁹ Gonne malatsi a rona otlhe a fetisiwa ke bogale jwa gago, dinyaga tsa rona di feta jaaka kgopolo.

¹⁰ Bophelo jwa rona ke dinyaga di le masome a a supang, mme fa thata e le teng, bo ka nna dinyaga tse di masome a robedi; mme se segolo sa tsona ke tapisego le tshwenyego; gonne bo feta ka bonako, mme re fofela koo.

¹¹ Ke mang yo o lemogang bogolo jwa bogale jwa gago, le kgakalo ya gago, ka fa poitshegong ya gago?

¹² Re rute go bala malatsi a rona gore re tle re tlhalefe mo dipelong.

¹³ Boa, Morena! Go tla nna goleele go le kae? O utlwele batlhanka ba gago botlhoko.

¹⁴ Re kgorise ka bopelotlhomogi jwa gago e sa le ka moso, mme re tla duduetsa, re itumela ka malatsi otlhe a rona.

¹⁵ Re fe boitumelo ka malatsi a a kana ka a o re watlhaileng ka ona le ka dinyaga tse di kana ka tse re bonyeng botlhoko mo go tsona.

¹⁶ A tiro ya gago e bonalele batlhanka ba gago, le kgalalelo ya gago bana ba bona.

¹⁷ A botsalano jwa Morena, Modimo wa rona, bo re okame. Tsweletsa tiro ya diatla tsa rona, ee, tiro ya diatla tsa rona o e tsweletse.