Lipesalema 89 - Setswana 1970

Ditshegofatso tse, Modimo o di solofeditse Dafita

¹ Sefela sa thuto sa ga Ethane, oora Esera.

² Ke tla opela bopelotlhomogi jwa Morena ka bosakhutleng; ke tla itsise losika longwe le longwe boikanyo jwa gago ka molomo wa me.

³ Gonne o rile: “Bopelontle bo tla tlhomama ka bosakhutleng; boikanyo jwa me ke bo thaile kwa legodimong.

⁴ Ke dirile kgolagano le moitlhaolelwi wa me, ke ikanetse Dafita, motlhanka wa me, ka re:

⁵ ‘Ke tla tlhomamisa losika lwa gago go ya kwa go sa khutleng, ke agela ditshika tsotlhe sedulo sa gago sa bogosi.’ ” Sela.

⁶ Magodimo a tla boka kgakgamatso ya gago, Morena, le boikanyo jwa gago bo bakwa mo phuthegong ya baitshepi.

⁷ Gonne ke mang yo o lekanang le Morena kwa marung, yo o tshwanang le Morena mo go bomorwa Modimo?

⁸ Modimo o boifega mo kopanong ya baitshepi; o mogolo, o bile o boitshega go feta botlhe ba ba o dikanyeditseng.

⁹ Morena, Modimo wa masomosomo, ke mang yo o tshwanang nao? Morena, o thata, boikanyo jwa gago bo mo tikologong ya gago.

¹⁰ Wena o laola boikgogomoso jwa lewatle; e re fa makhubu a lone a tsholetsega, wena o a didimatse.

¹¹ O tšhwetlakantse Rahabe jaaka yo o tlhabilweng; o phatlaladitse baba ba gago ka letsogo le le thata la gago.

¹² Magodimo ke a gago le lefatshe ke la gago; lefatshe le tse di tletseng mo go lone wena o di thaile tsotlhe.

¹³ Bokone le borwa o di tlhodile; Thabore le Heremone di dudueletsa leina la gago.

¹⁴ O na le letsogo la bonatla, seatla sa gago se thata, letsogo le le jang la gago le tsholetsegile.

¹⁵ Tshiamo le molao ke motheo wa sedulo sa gago sa bogosi; bopelonomi le boammaaruri di etelela sefatlhego sa gago pele.

¹⁶ Go sego morafe o o itseng go duduetsa, o o tsamayang mo leseding la sefatlhego sa gago, Morena.

¹⁷ Ba ipelela leina la gago ka metlha, ba godisiwa ka tshiamo ya gago.

¹⁸ Gonne wena o mokgabo wa thata ya bona, o tsholetsa lonaka lwa rona ka bopelonomi jwa gago.

¹⁹ Gonne thebe ya rona ke ya Morena, kgosi ya rona ke ya Moitshepi wa Iseraele.

²⁰ Ka motlha oo, o ne wa bua le baitshepi ba gago ka pono wa re: “Ke neetse mogale thuso, ke godisitse yo o tlhaotsweng mo morafeng.

²¹ Ke bonye Dafita, motlhanka wa me, ka mo tlotsa lookwane lwa me lo lo boitshepo,

²² yo seatla sa me se tla nnang le ena ka gale, yo letsogo la me le tla mo tiisang.

²³ Mmaba ga a ka ke a mo tlhasela, le e seng rra-bosula go mo patika.

²⁴ Ke tla remaganya baganetsi ba gagwe fa pele ga gagwe, ke bolaya ba ba mo tlhoileng.

²⁵ Mme boikanyo jwa me le bopelonomi jwa me di tla nna nae, lonaka lwa gagwe lo tla tsholetsegela godimo ka leina la me.

²⁶ Ke baya seatla sa gagwe mo lewatleng, le letsogo la gagwe le le jang mo dinokeng.

²⁷ O tla nthaya a re: ‘Wena o rre, o Modimo wa me, o lefika la thuso ya me.’

²⁸ Le gona ke tla mo dira motsalwapele le yo mogolo mo dikgosing tsa lefatshe.

²⁹ Ke tla mmolokela bopelotlhomogi jwa me ka bosakhutleng, mme kgolagano ya me e tla mo tlhomamela.

³⁰ Ke tla dira gore losika lwa gagwe e nne lo lo sa khutleng, le sebaka sa sedulo sa gagwe sa bogosi se lekane le malatsi a legodimo.

³¹ Mme e tla re fa bomorwawe ba tlogela molao wa me, ba sa tsamae mo go tse di ntshiametseng,

³² fa ba itshepolola ditaelo tsa me, ba sa tlhokomele ditao tsa me,

³³ ke ba beletse ditlolo tsa bona ka thupa le melato ya bona ka dipetso.

³⁴ Le fa go ntse jalo bopelotlhomogi jwa me ga nkitla ke bo tlosa mo go ene, le e seng go mo senyetsa boikanyo jwa me.

³⁵ Ga nke ke itshepolola kgolagano ya me, le e seng go fetola se se duleng mo molomong wa me.

³⁶ Ke ikanne gangwe fela ka boitshepo jwa me – ga ke ne ke aketsa Dafita! –

³⁷ Ka re: ‘Losika lwa gagwe lo tla nnela ruri, le sedulo sa gagwe sa bogosi jaaka letsatsi fa pele ga me.

³⁸ O tla tlhomama ka bosakhutleng jaaka ngwedi. Kana mosupi yo o mo legodimong o boikanyo.’ ” Sela.

³⁹ Mme wena o latlhile motlodiwa wa gago, wa mo nyatsa, wa mo galefela.

⁴⁰ O sentse kgolagano e o e dirileng le motlhanka wa gago, wa itshepolola serwalo sa gagwe sa bogosi ka go se latlhela fa fatshe.

⁴¹ O thubile dipota tsotlhe tsa gagwe, dikago tsa phemelo tsa gagwe wa di ntsha marope.

⁴² Botlhe ba ba neng ba feta ka tsela ba ne ba mo thukhutha dilo, a sotlega mo go ba ba agileng nae.

⁴³ O godisitse mabogo a a jang a baganetsi ba gagwe, wa itumedisa baba botlhe ba gagwe.

⁴⁴ O titinne bogale jwa tšhaka ya gagwe, wa se ka wa mo natlafatsa mo tlhabanong.

⁴⁵ O fifaditse kgalalelo ya gagwe, wa digela sedulo sa gagwe sa bogosi fa fatshe.

⁴⁶ O khutshwafaditse malatsi a bokau jwa gagwe, wa mo jesa ditlhong. Sela.

⁴⁷ Morena, o tla iphitlha goleele go le kae? A bogale jwa gago bo tla tuka jaaka molelo?

⁴⁸ Gopola tlhe gore bophelo ke eng? A batho botlhe o ba bopetse lefela?

⁴⁹ Motho ke mang yo o ka phelang, a sa bone loso, mme a golola mowa wa gagwe mo thateng ya felo ga baswi? Sela.

⁵⁰ Morena, mapelotlhomogi a gago a pele a kae, a o ikanetseng Dafita ka fa boikanyong jwa gago?

⁵¹ Morena, gopola tshotlego ya badiredi ba gago e ke e rweleng ka sehuba sa me e tswa merafeng yotlhe e megolo,

⁵² e baba ba gago, Morena, ba sotlileng ka yona, e ba sotlileng dikgato tsa motlodiwa wa gago ka yona.

⁵³ A Morena a bakwe ka bosakhutleng. Amen, ee, a go nne jalo!