Lipesalema 88 - Setswana 1970

Selelo sa motlhoboga-thuso

¹ Sefela. Pesalome ya boora Kora e e kwaletsweng moopedisi, e e opelwang ka moopelo wa: “Bolwetse”. Sefela sa thuto sa ga Hemane, oora Esera.

² Morena, Modimo wa thuso ya me, ke goela go wena bosigo le motshegare.

³ A thapelo ya me e fitlhe fa go wena; sekegela selelo sa me tsebe.

⁴ Gonne pelo ya me e tennwe ke dipogo; bophelo jwa me bo atametse felo ga baswi.

⁵ Ke setse ke balelwa le ba ba fologelang mo lebitleng, ke tshwana le monna yo o se nang thata.

⁶ Ke laditswe le baswi, jaaka ba ba bolailweng ba letse mo diphupung, ba o sa tlholeng o ba gopola, ka ba kgaogantswe le letsogo la gago.

⁷ O mpeile kwa tlasetlase moleteng, mo mafifing, mo matennye.

⁸ Bogale jwa gago bo nkimetse, o nkgateletse ka merwalela ya gago yotlhe. Sela.

⁹ Ba ke itsanyeng sentle nabo o ba tlositse fa go nna; o ntirile seila sa bona; ke tswaletswe, ke palelwa ke go tswela kwa ntle.

¹⁰ Leitlho la me le felelela ka pogo. Ke ntse ke go bitsa. Morena, ka letsatsi lengwe le lengwe ke go tsholeletsa mabogo.

¹¹ A o tla dira dikgakgamatso mo baswing; gongwe ba ba suleng a ba tla tsoga ba go baka? Sela.

¹² A bopelothomogi jwa gago bo ka bolelwa mo phupung, gongwe boikanyego jwa gago kwa Felong ga baswi?

¹³ Dikgakgamatso tsa gago a di ka itsege mo lefifing, gongwe tshiamo ya gago mo lefatsheng la tebalo?

¹⁴ Mme nna, Morena, ke goela go wena, thapelo ya me e tla go wena, e sa le moso.

¹⁵ Morena, o latlhelang mowa wa me, o mphitlhelelang sefatlhego sa gago.

¹⁶ Ke tlaletswe, ke wa go swa go tswa bokaung jwa me; ke rwele dipoitshego tsa gago, ke batla go tlhoboga.

¹⁷ Bogale jwa gago bo nkwetse; dipoitshego tsa gago di nnyeleditse;

¹⁸ di ntikanyeditse jaaka metsi letsatsi lotlhe, di ntikile gotlhegotlhe.

¹⁹ O tlositse moratiwa le tsala fa go nna, lefifi ke lone tsala ya me.