Lipesalema 86 - Setswana 1970

Kopo ya go batla thuso

¹ Thapelo ya ga Dafita. Morena, ntshekegele tsebe, o nkutlwe; gonne ke motlalelwi le mohumanegi.

² Boloka mowa wa me; gonne ke boitshepo. Wena Modimo wa me, thusa motlhanka wa gago yo o go ikantseng.

³ Intshwarele, Morena; gonne ke ntse ke kuela go wena letsatsi lotlhe.

⁴ Itumedise mowa wa motlhanka wa gago; gonne ke tsholeletsa mowa wa me kwa go wena, Morena.

⁵ Gonne wena, Morena, o molemo le boitshwarelo; o bopelonomi jo bogolo mo go botlhe ba ba goelang kwa go wena.

⁶ Morena, reetsa thapelo ya me, o tlhokomele lentswe la mekokotlelo ya me.

⁷ Ke goela kwa go wena ka letsatsi la tlalelo ya me; gonne o a nkutlwa.

⁸ Ga go ope mo medimong o o tshwanang nao, Morena; ga go na sepe se se tshwanang le ditiro tsa gago.

⁹ Ditšhaba tsotlhe tse o di dirileng di tla tla, di obamela fa pele ga gago, Morena, di tlotla leina la gago.

¹⁰ Gonne wena o mogolo, o dira dikgakgamatso; wena o Modimo o le wesi fela.

¹¹ Morena, nthute tsela ya gago gore ke tsamae mo boammaaruring jwa gago; kitlanya pelo ya me gore e boife leina la gago.

¹² Morena, Modimo wa me, ke rata go go baka ka pelo yotlhe le go tlotla leina la gago ka bosenabokhutlo.

¹³ Gonne bopelontle jwa gago bo bogolo mo go nna, o golotse mowa wa me mo felong ga baswi, fa go kwa tlasetlase.

¹⁴ Modimo, baikgantshi ba ntsogetse; lekoko la ba ba peloethata le tsoma botshelo jwa me, mme ga ba go gopole.

¹⁵ Mme wena Morena, o Modimo o o boutlwelo-botlhoko le boitshwarelo; ga o fele pelo, o tletse bopelotlhomogi le boammaaruri.

¹⁶ Retologela kwa go nna, o intshwarele; naya motlhanka wa gago thata ya gago, o thuse morwa lelata la gago.

¹⁷ Dira sesupo sa molemo mo go nna gore ba ba ntlhoileng ba se bone, ba be ba tlhajwe ke ditlhong, ka wena Morena o nthusitse, o bile o nkgomoditse.