Lipesalema 85 - Setswana 1970

Pholoso e atametse

¹ Pesalome ya boora Kora e e kwaletsweng moopedisi.

² Morena, o utlwetse lefatshe la gago botlhoko, wa fetola tatlhego ya Jakobe.

³ O itshwaretse molato wa morafe wa gago, wa bipa maleo otlhe a bona. Sela.

⁴ O tlositse kgakalo yotlhe ya gago, wa boa mo bogaleng jwa gago jo bo tukang.

⁵ Re tlhabolole, Modimo wa pholoso ya rona, o khutlise kgakalo ya gago mo go rona.

⁶ A o tla re galefela ka bosakhutleng, a bogale jwa gago o tla bo tsweletsa pele go ya tshikatshikeng?

⁷ A ga o kitla o re phedisa gape gore batho ba gago ba go itumelele?

⁸ Re bontshe bopelotlhomogi jwa gago, Morena, o re nee pholoso ya gago.

⁹ Ke rata go utlwa se Morena, Modimo, o tla se buang; gonne batho ba ona, e bong baratiwa ba ona, ruri, o tla bua nabo tsa kagiso. Fela a ba se boele gape kwa bosilong.

¹⁰ Kana pholoso ya ona e gaufi le ba ba o boifang gore kgalalelo e age mo lefatsheng la rona.

¹¹ Bopelontle le boammaaruri di a kgatlhana; tshiamo le kagiso di a atlana.

¹² Boammaaruri bo tlhoga mo lefatsheng; tshiamo e lebile kwa tlase e le kwa legodimong.

¹³ Le gona Morena o tla naya se se molemo, lefatshe la rona le tla ntsha leungo la lone.

¹⁴ Tshiamo e mo eteletse pele, e tlhokometse tsela ya dikgato tsa gagwe.