Lipesalema 83 - Setswana 1970

Baba ba ntlheng tsotlhe

¹ Sefela. Pesalome ya ga Asafe.

² Modimo, se tlhokomologe, se didimale, se nne fela, Modimo!

³ Gonne, bona, baba ba gago ba a feretlha; ba ba go tlhoileng ba tsholetsa ditlhogo.

⁴ Ba logela batho ba gago maano a bolotsana, ba gakololana ka ga ba o ba sireletsang.

⁵ Ba re: “Tlayang, a re ba nyeletseng gore ba se tlhole ba nna morafe le gore leina la Iseraele le se tlhole le gopolwa.”

⁶ Ba gakololanye ka bongwefela jwa pelo, ba go ikgolaganyetsa:

⁷ E bong ba ditente tsa Etomo le Baisemaele le Bamoabe le Bahagare

⁸ le ba Gebale le Baamone le Baamaleke le Bafelesita mmogo le baagi ba Tiro;

⁹ Baasiria le bona ba ikopantse nabo, ba thusa boora Lote. Sela.

¹⁰ Ba direle jaaka o kile wa direla Bamidiane le Sisera le Jabine fa nokeng ya Kisone.

¹¹ Ba nyeleditswe kwa Entore, ba tswa letshotelo la tshimo.

¹² Dira batlotlegi ba bona gore ba nne jaaka Orebe le Seebe le dikgosana tsa bona jaaka Seba le Salemuna

¹³ tse di reng: “A re ithopeleng maago a Modimo.”

¹⁴ Modimo wa me, ba dire jaaka matlakala le jaaka moko o o gogolwang ke phefo.

¹⁵ Molelo o fisa sekgwa le kgabo ya molelo e tshuba dithaba:

¹⁶ Ba leleke jalo ka ledimo la gago, o ba boifise jalo ka kgwanyape ya gago.

¹⁷ Tlatsa difatlhego tsa bona ditlhong gore ba batle leina la gago, Morena.

¹⁸ A ba tlhajwe ke ditlhong, ba boife ka go sa feleng. A ba setlhafale ka ditlhong, ba latlhege

¹⁹ gore ba lemoge, fa wena yo o bidiwang Morena ò le Mogodimodimo ò le wesi o ò okameng lefatshe lotlhe.