Lipesalema 82 - Setswana 1970

Moatlhodi yo mogolo le baatlhodi ba tshiamololo

¹ Pesalome ya ga Asafe. Modimo o eme mo phuthegong ya medimo; o atlhola fa gare ga medimo.

² Lo tla atlhola ka tshiamololo goleele go le kae, lo ntse lo gobelelela baikepi? Sela.

³ Siamisetsang ba babotlana le dikhutsana; nayang batlalelwi le batlhoki se se ba tshwanetseng.

⁴ Pholosang ba babotlana le bahumanegi; lo ba golole mo diatleng tsa baikepi.

⁵ Medimo eo ga e na temogo, ga e na tlhaloganyo; e kgarakgatshega mo lefifing; metheo yotlhe ya lefatshe e a tshikinyega.

⁶ Nna ka nosi ke rile, lo medimo; mme lotlhe lo bomorwa Mogodimodimo.

⁷ Mme ruri, lo tla swa jaaka batho, lo tla wa jaaka mongwe wa ditona.

⁸ Tloga o eme, Modimo, o atlhole lefatshe; gonne o tla rua ditšhaba tsotlhe.