Lipesalema 81 - Setswana 1970

Poko ya Morena le kgothatso ya batho ba gagwe

¹ Pesalome ya ga Asafe e e kwaletsweng moopedisi, e e opelwang ka moopelo wa ba ba gatang segatelo.

² Ipeleleng Modimo o e leng thata ya rona, lo dudueletse Modimo wa ga Jakobe.

³ Tlhabang sefela, lo letse moropa le katara e e itumedisang le harepa.

⁴ Letsang phala, fa ngwedi o rogwa, gape fa o le mosweu ka letsatsi la moletlo wa rona.

⁵ Gonne ke molao o o beetsweng Iseraele, ke se se siametseng Modimo wa ga Jakobe.

⁶ O o beile go nna tshupo mo go Josefa, jale fa o bololela lefatshe la Egepeto. Ke utlwa puo e ke ne ke sa e itse, e re:

⁷ “Ke ne ka rola magetla a gagwe morwalo, diatla tsa gagwe tsa imololwa seroto.

⁸ O no wa bitsa o le mo tlalelong, ka go golola; ka go araba ke fitlhegile mo marung a a dumang, ka go leka fa metsing a Meriba. Sela.

⁹ Reetsa, morafe wa me, ke tla go kaela; wena Iseraele, e kete o ka bo o nkutlwa.

¹⁰ A go se ka ga nna modimo ope wa seeng mo go wena; le gona o se ka wa obamela modimo ope wa ba sele.

¹¹ Ke nna Morena, Modimo wa gago, o o go ntshitseng kwa lefatsheng la Egepeto; atlhamisa legano la gago gore ke le tlatse.

¹² Mme batho ba me ba ne ba sa reetse lentswe la me; Iseraele o ne a sa utlwane le nna.

¹³ Ke fa ke ba naya tsela ka ntlha ya logwadi lwa dipelo tsa bona; ba itsamaela ka fa maitaolong a bona.

¹⁴ E kete batho ba me ba ka bo ba nkutlwa! E kete Iseraele o ka bo a sepela mo ditseleng tsa me!

¹⁵ Ke ne ke tla akofa ke kokobetsa baba ba bona, ke tsholeletsa baganetsi ba bona letsogo.

¹⁶ Ba ba tlhoileng Morena ba ne ba tla mo tlakisa, mme sebaka sa bona Baiseraele e ne e tla nna se se sa khutleng.

¹⁷ O ne a tla ba jesa mabele a a nonneng. Ke ne ke tla go kgorisa dinotshe tsa semana.”