Lipesalema 80 - Setswana 1970

Thapelo ya go tlhabolola Iseraele, e leng tshimo ya Modimo ya moweine

¹ Pesalome ya tshupo ya ga Asafe e e kwaletsweng moopedisi, e e opelwang ka moopelo wa: “Madutla”.

² Wena, Modisa wa Iseraele, a o ko o utlwe; wena yo o gogang Josefa jaaka letsomane, wena yo o ntseng godimo ga boKerubime, iponatse ka phatsimo.

³ Tsosa nonofo ya gago fa pele ga Eferaime le Benyamene le Manase, mme o tle go re thusa.

⁴ Re tlhabolole, Modimo, o phatsimise sefatlhego sa gago gore re phologe.

⁵ Morena, Modimo wa masomosomo, o tla galefela thapelo ya batho ba gago goleele go le kae?

⁶ O ba jesitse senkgwe sa dikeledi, wa ba nosa dikeledi gagolo thata.

⁷ O re dirile se se lwelwang mo go ba re bapileng nabo, baba ba rona ba a re sotla.

⁸ Re tlhabolole, Modimo wa masomosomo, o phatsimise sefatlhego sa gago gore re phologe.

⁹ O epolotse setlhatshana sa moweine mo lefatsheng la Egepeto, wa leleka ditšhaba, wa se tlhoma.

¹⁰ O se baakanyeditse manno, sa nama medi, sa tlala lefatshe.

¹¹ Dithaba di ne di khurumediwa ke moriti wa sona, le mesetere ya Modimo e khurumediwa ka dikala tsa sona.

¹² Se ne se godisa dikala tsa sona go fitlha kwa lewatleng le matlhogela a sona go fitlha kwa nokeng ya Ferathe.

¹³ Kana o ne o phomelang dipota tsa sona gore botlhe ba ba fetang ka tsela ba se fotlhe?

¹⁴ Kolobe ya sekgwa e a se epolola, diphologolo tsa naga di a se ja.

¹⁵ Tswetswe, boa, Modimo wa masomosomo; leba, o le kwa legodimong, o bone; o tlhokomele setlhatshana se sa moweine;

¹⁶ e bong setlhongwa se se tlhomilweng ka letsogo la gago le le jang, le morwa yo ò mo ikgodiseditseng.

¹⁷ Se fisitswe ka molelo, sa kgaolwa; a baba ba latlhege ka kgalemelo ya sefatlhego sa gago.

¹⁸ A letsogo la gago le okame monna yo o dirilweng ke letsogo la gago le le jang, e bong morwa motho yo ò mo ikgodiseditseng.

¹⁹ Foo ga re kitla re go hularela. Re phedise, mme re tla bitsa leina la gago.

²⁰ Re tlhabolole, Morena, Modimo wa masomosomo, o phatsimise sefatlhego sa gago gore re phologe.