Lipesalema 79 - Setswana 1970

Batho ba ba kgobegileng ba Modimo

¹ Pesalome ya ga Asafe. Modimo, baheitane ba tsenye mo bosweng jwa gago; ba itshepolotse Tempele e e Boitshepo ya gago; ba dirile Jerusalema maroperope fela.

² Ditoto tsa batlhanka ba gago ba di file dinonyane tsa loapi go di ja; nama ya baitshepi ba gago ba e file dibata tsa naga.

³ Madi a bona ba a tsholotse jaaka metsi tikologong ya Jerusalema, mme go ne go se ope yo o ba fitlhang.

⁴ Re diregile nyatsego fela mo go ba re bapileng nabo; le tshotlego le kgobo mo go ba ba tikologong ya rona.

⁵ E tla nna goleele go le kae, Morena? A o tla galefela ruri, a lefufa la gago le tla tuka jaaka molelo?

⁶ Tshololela kgakalo ya gago mo baheitaneng ba ba sa go itseng le mo magosing a a sa bitseng leina la gago.

⁷ Gonne ba jele Jakobe, ba senya boago jwa gagwe.

⁸ O se ka wa re beletsa ditshiamololo tsa borraetsho-mogolwagolwane; a boutlwelo-botlhoko jwa gago bo re kgatlhantshe ka bonako, gonne re koafetse thata.

⁹ Re thuse, Modimo wa pholoso ya rona ka ntlha ya tlotlo ya leina la gago; o re namolele, o re itshwarele maleo ka ntlha ya leina la gago.

¹⁰ Kana baheitane ba tla buelang ba re: “Modimo wa bona o kae?” A pusolosetso ya madi a a tsholotsweng a batlhanka ba gago e itsege mo baheitaneng fa pele ga matlho a rona.

¹¹ A phegelo ya bagolegwi e fitlhe fa pele ga gago; a bona ba ba tshwanetseng go swa ba lesiwe ka fa bogolong jwa letsogo la gago.

¹² Mme kgalo e bona ba re bapileng nabo ba go kgadileng ka yona, Morena, o e ba busetse gasupa mo dihubeng tsa bona.

¹³ Mme rona ba re leng batho ba gago le dinku tsa bofulo jwa gago, re tla go leboga ka bosakhutleng, re bolela pako ya gago go ya tshikatshikeng.