Lipesalema 78 - Setswana 1970

Tirafalo ya Baiseraele ke tlhagiso ya rona

¹ Sefela sa thuto sa ga Asafe. Lona batho ba me, reetsang thuto ya me, sekegelang mafoko a molomo wa me ditsebe.

² Ke tla tswa molomo, ke bolela seane, ke ntsha dinyepo tsa bogologolo.

³ Tse re di utlwetseng, ra di itse, tse borraetsho ba di re boleletseng,

⁴ ga re ka ke ra di lobela bana ba bona; re tla bolelela losika lo lo tlang ditiro tsa pako tsa Morena, le thata ya gagwe, le dikgakgamatso tse a di dirileng.

⁵ Gonne o tlhomile tshupo mo go Jakobe, a baya molao mo go Iseraele o a o laetseng borraetsho gore ba o itsise bana ba bona,

⁶ gore losika lo lo tlang lo o itse, e bong bana ba ba tla tsalwang, gore ba tle ba o bolelele bana ba bona,

⁷ le gore ba ikanye Modimo, mme ba se lebale ditiro tsa Modimo, mme ba tshegetse ditaolo tsa ona

⁸ gore ba se nne jaaka borraabo ba e neng e le losika lo lo tlhogo-e-thata lwa borukhutlhi, losika lo lo tlhokang pelo ya tlhomamo le mowa o o lebileng Modimo ka boikanyo.

⁹ Baeferaime ba ba neng ba ipaakantse go hula ka bora, ba menoga, ba tshaba ka letsatsi la tlhabano.

¹⁰ Ga ba a ka ba tlhokomela kgolagano ya Modimo, ba bile ba ganne go tsamaya ka fa molaong wa ona;

¹¹ ba lebala ditiro tsa ona le dikgakgamatso tse o di ba bontshitseng.

¹² O dirile dikgakgamatso fa pele ga borraabo kwa lefatsheng la Egepeto, mo nageng ya Soane.

¹³ O kgaogantse lewatle, wa ba tshedisa; wa emisa metsi jaaka lobota.

¹⁴ Motshegare o ne wa ba goga ka leru, mme bosigo jotlhe ka lesedi la molelo.

¹⁵ O phatlotse mafika mo sekakeng, wa ba nosa ka botlalo jaaka ka merwalela.

¹⁶ O ne wa ntsha dinokana mo lefikeng, wa eledisa metsi jaaka dinoka.

¹⁷ Mme ba fela ba tswelela pele go o leofela, ba rukhutlhegela Mogodimodimo kwa nageng e e omileng.

¹⁸ Ba leka Modimo mo dipelong tsa bona ka go lopa dijo ka fa kgatlhegong ya bona.

¹⁹ Ba bua kgatlhanong le Modimo ba re: “A Modimo o ka baakanya bojelo mo sekakeng?

²⁰ Ee, o iteile lefika, metsi a ba a ela, dinokana tsa phothosela. Mme a senkgwe le sona o ka se ntsha, gongwe wa naya batho ba ona nama?”

²¹ Ke gona e rileng Morena a utlwa, a tuka bogale; molelo wa tukela Jakobe, ee, bogale jwa tsogela Iseraele,

²² ka ba se ka ba dumela Modimo, le e seng go ikanya thuso ya ona.

²³ Jaanong wa laela maru kwa godimo, wa bula mejako ya legodimo.

²⁴ Wa ba nesetsa Mmana go o ja, wa ba naya mabele a legodimo.

²⁵ Ba ja sejo sa baengele, wa ba romela mfago, ba kgora.

²⁶ O ne wa fokisa phefo ya botlhabatsatsi kwa legodimong, wa phunya phefo ya borwa ka thata ya ona.

²⁷ Wa ba nesetsa nama jaaka lerole le dinonyane tse di diphuka jaaka motlhaba wa lewatle.

²⁸ Wa di digela mo bothibelelong jwa bona tikologong ya maago a bona.

²⁹ Foo ba ja, ba kgora thata; wa ba tsisetsa tse ba neng ba di eleditse.

³⁰ E rile ba ise ba bakele keletso ya bona, nama e sa ntse e le mo maganong a bona,

³¹ bogale jwa Modimo jwa ba tsogela, mme wa bolaya ba ba nonneng mo go bona, wa namalatsa makau a Iseraele.

³² Mme ba tlhokomologa tsotlhe tseo, ba fela ba leofela pele, ba se ka ba dumela dikgakgamatso tsa ona.

³³ Ka moo wa fedisa malatsi a bona mo bosengsepe, le dinyaga tsa bona mo theregong.

³⁴ Mme e ne ya re fa o ba bolaya, ba botse ka ga ona, ba tlhabologe, ba batle Modimo;

³⁵ ba gakologelwe, fa Modimo e le lefika la bona, mme Modimo Mogodimodimo e le mogolodi wa bona.

³⁶ Mme ba rata go o kgona ka melomo ya bona, ba o aketsa ka diteme tsa bona;

³⁷ mme dipelo tsa bona di ne di sa o ineele ka tlhomamo, ba sa tlhokomele kgolagano ya ona ka boikanyego.

³⁸ Mme ona ka o le kutlwelo-botlhoko, o ne o itshwarela molato, o sa ba nyeletse; e bile o ne o busa bogale jwa ona gantsi, o sa tsose kgakalo yotlhe ya ona.

³⁹ O ne o gopola, fa bona ba le nama fela, ba le mowa o o fetang, o o sa tlholeng o ka boa.

⁴⁰ Ba ne ba o rukhutlhegela gantsi jang ne kwa sekakeng, ba o hutsafatsa kwa gareganaga.

⁴¹ Ba leka Modimo gangwe le gape, ba kgopisa Moitshepi wa Iseraele.

⁴² Ba ne ba se ke ba gakologelwa letsogo la ona, le e seng letsatsi le o ba namoletseng mmaba ka lone,

⁴³ jale fa o ne o dira ditshupo tsa ona kwa lefatsheng la Egepeto, le dikgakgamatso tsa ona mo nageng ya Soane.

⁴⁴ O ne wa fetola metsi a dinoka tsa bona madi, le a dinokana tsa bona gore ba retelelwe ke go nwa.

⁴⁵ Wa ba romela diboba, tsa ba loma, le digwagwa, tsa ba senyetsa.

⁴⁶ Thobo ya bona wa e naya segongwane, le leungo la matsapa a bona wa le naya tsie.

⁴⁷ Wa senya moweine wa bona ka sefako, le megokare wa bona ka serame.

⁴⁸ Wa bolaya dikgomo tsa bona ka sefako, le matsomane a bona ka ditladi.

⁴⁹ Wa ba romela bogale jo bo tukang jwa ona, le kgakalo le kgalefo le pitlagano, lesomo leo la barongwi ba tlalelo.

⁵⁰ Wa baakanyetsa bogale jwa ona tsela, wa se ka wa thibela mewa ya bona go ya losong, wa neela leroborobo maphelo a bona.

⁵¹ Wa itaya maitibolo a tsotlhe mo lefatsheng la Egepeto, le bana ba ntlha ba thata ya bona mo ditenteng tsa ga Hame.

⁵² Mme batho ba ona wa ba bolotsa jaaka dinku, wa ba goga mo sekakeng jaaka letsomane.

⁵³ Wa ba tsamaisa tshireletsong, mo ba sa boifeng sepe; mme baba ba bona, lewatle la ba nwetsa.

⁵⁴ Wa ba fitlhisa kwa lefatsheng le le boitshepo la ona, kwa thabeng e letsogo le le jang la ona le e thopileng.

⁵⁵ Mme wa leleka merafe fa pele ga bona, wa ba ruisa lefatshe la yona jaaka boswa jo ba bo lekanyeditsweng, wa agisa ditso tsa Iseraele mo matlong a bona.

⁵⁶ Mme bona ba ne ba leka Modimo, Mogodimodimo, ba o rukhutlhegela, ba sa tlhokomele ditshupo tsa ona.

⁵⁷ Ba ikepa, ba dira ka boikanyologo jaaka borraabo; ba boela kwa morago jaaka bora jo bo sa ikanngweng.

⁵⁸ Ba o kgopisa ka dithota tsa tlhabelo tsa bona, ba tsosa lefufa la ona ka medimo ya diseto ya bona.

⁵⁹ E rile Modimo o utlwa, wa galefa, wa latlha Iseraele gotlhe,

⁶⁰ wa ba wa tlogela Taberenakele ya kwa Silo, e bong tente e o neng o e tlhomile mo bathong.

⁶¹ Mme thata ya ona wa e neela mo botshwarong le kgalalelo ya ona ya ona mo letsogong la mmaba.

⁶² Batho ba ona wa ba neela mo tšhakeng; boswa jwa ona wa bo gakalela.

⁶³ Molelo o jele makau a bona; makgarebe a bona ga a ka a tlhabelwa mogolokwane wa nyalo.

⁶⁴ Baperesiti ba bona ba ole ka tšhaka, mme batlholagadi ba bona ba palelwa ke go ba lelela.

⁶⁵ Foo Morena a thanya jaaka mongwe yo o ne a robetse, jaaka mogale yo o neng a fentswe ke weine.

⁶⁶ A itaya baganetsi ba gagwe, a ba busetsa kwa morago, a ba tsisetsa tshotlego e e sa khutleng.

⁶⁷ Ke go re: A latlha tente ya ga Josefa, a se ka a itlhaolela lotso lwa ga Eferaime,

⁶⁸ mme a itlhaolela lotso lwa ga Juta, thaba ya Sione e a e ratang.

⁶⁹ A aga Felo-ga-Boitshepo ga gagwe jaaka bogodimo jwa legodimo, jaaka lefatshe le o le thaetseng bosakhutleng.

⁷⁰ A itlhaolela Dafita, motlhanka wa gagwe, a mo tsaya a le kwa merakeng ya dinku.

⁷¹ A mo tlosa a disitse dinku tse di amusang gore a dise Jakobe, batho ba gagwe, le Iseraele, boswa jwa gagwe.

⁷² Mme o ne a ba disa ka fa pelong ya boammaaruri ya gagwe, a ba tsamaisa ka diatla tse di maatlametlo.