Lipesalema 77 - Setswana 1970

Mekokotlelo ya go kopa thuso

¹ Pesalome ya ga Asafe e e kwaletsweng moopedisi, e e opelwang ka moopelo wa ga Jeduthune.

² Lentswe la me le lebile Modimo, ke a kua; lentswe la me le lebile Modimo gore o ntshekegele tsebe.

³ Ke batla Morena ka letsatsi la tlalelo ya me; letsogo la me le otlologile mo bosigong, le sa lape; mowa wa me o gana go gomotsega.

⁴ Fa ke gopola Modimo, ke fegelwe; fa ke akanya, mowa wa me o nne mo maibing. Sela.

⁵ O tshwere dintshi tsa matlho a me, ke a tlhobaela, e bile ke palelwa ke go bua.

⁶ Ke akanya malatsi a sebaka sa pele le dinyaga tsa bogologolo tala.

⁷ Ke gopola go letsa kwadi ga me mo bosigong; ke akanya mo pelong ya me, mowa wa me o tlhotlhomisa o re:

⁸ “A Morena o tla latlhela ruri, a ga a nke a tlhola a kgatlhwa ke rona?

⁹ A bopelontle jwa gagwe bo feletse ruri? A tsholofetso e e neng e raya ditshika tsotlhe e khutlile?

¹⁰ A Modimo o lebetse go itshwarela, a kampo o tswaletse boutlwelo-botlhoko jwa ona ka bogale?” Sela.

¹¹ Foo ka re: “Ke bolwetse jwa me, fa ke ne ke re: Letsogo le le jang la Mogodimodimo le fetogile.”

¹² Ke tla gopola ditiro tsa Morena; ee, ke tla gopola dikgakgamatso tsa gago tsa bogologolo;

¹³ ke tla akanya tiro yotlhe ya gago; ke elelelwa tse o di dirileng.

¹⁴ Tsela ya gago, Modimo, e mo boitshepong; ke modimo ofe o o kana ka wena, Modimo wa rona?

¹⁵ Ke wena, Modimo, o o dirang dikgakgamatso, o itsisitse thata ya gago mo merafeng.

¹⁶ O golotse batho ba gago ka letsogo le le thata, boora Jakobe le Josefa. Sela.

¹⁷ Metsi a go bonye, Modimo, metsi a go bonye, a roroma; ee, merwalela ya tetesela.

¹⁸ Maru a tsholotse metsi, maru a duma; metswi ya gago le yona ya thuntshiwa.

¹⁹ Tumo ya gago ya maru e utlwetse jaaka koloi e kgothosela; dikgadima tsa bonesa lefatshe; lefatshe la roroma, la kutuma.

²⁰ Tsela ya gago e ne e le mo lewatleng, le ditselana tsa gago mo metsing a magolo; mme metlhala ya gago e ne e sa bonale.

²¹ O ne o goga batho ba gago jaaka letsomane ka Moše le Arone.