Lipesalema 76 - Setswana 1970

Modimo ke moatlhodi le mogolodi

¹ Pesalome ya ga Asafe e e kwaletsweng moopedisi; sefela se se opedisiwang ka kwadi ya dithapo.

² Modimo o itsiwe mo Juta; leina la ona le legolo mo Iseraele.

³ Ee, motlaagana wa ona o mo Saleme, le boago jwa ona mo Sione.

⁴ O robakile metsu-seka-ditladi ya bora teng, le thebe le tšhaka le tsa ntwa. Sela.

⁵ O a phatsima, o a galalela, o tswa kwa dithabeng tsa thopo.

⁶ Dinatla tse di pelokgale di thopetswe, di gateletswe ke boroko, bagale botlhe ba repile diatla.

⁷ Modimo wa ga Jakobe, koloi ya ntwa le pitse di tserwe ke madiopo ka kgalemelo ya gago.

⁸ Wena o yo o boitshegang; ke mang yo o ka emang fa pele ga gago, fa bogale jwa gago bo tuka?

⁹ O ne wa utlwatsa katlholo go tswa kwa legodimong; lefatshe la tshoga, la didimala,

¹⁰ fa Modimo o ema go atlhola gore o thuse botlhe ba ba pelonolo ba lefatshe. Sela.

¹¹ Gonne bogale jwa motho bo a go tlotla, o itlama ka bogale jo bo setseng.

¹² Ikaneleng Morena, Modimo wa lona, lo o lefele maikano. A botlhe ba ba o dikanyeditseng ba tsisetse ona o o tshabegang dineo,

¹³ o o kokobetsang boikgantsho jwa dikgosana, o o tshabegang mo dikgosing tsa lefatshe.