Lipesalema 73 - Setswana 1970

KAROLO YA BORARO, DIPESALOME 73 – 89 Tsamaiso e e gakgamatsang ya Modimo

¹ Pesalome ya ga Asafe. Ruri, Modimo o molemo mo go Iseraele, mo go bona ba ba dipelo di phepa.

² Mme nna, dinao tsa me di batlile go kgotšwa, dikgato tsa me di batlile go relela.

³ Ke ne ke fufegela baikgantshi ka go bona letlhogonolo la baikepi.

⁴ Gonne ga ba na matlhoko; mebele ya bona e itekanetse, e nonne.

⁵ Ga ba mo tapisegong ya batho ba bangwe; ga ba tshwenyege jaaka batho ba bangwe.

⁶ Ke gona ka moo mokgabo wa molala wa bona e leng boikgodiso; bosetlhogo ba bo apere jaaka kobo.

⁷ Matlho a bona a rotogile ka monono; maano a dipelo tsa bona a a tswelela.

⁸ Ba a sotla, ba bua patiko ka boikepo; ba bua ka boikgodiso.

⁹ Ba bua tse di kgatlhanong le tsa legodimo; diteme tsa bona di itaola mo lefatsheng.

¹⁰ Ke ka moo batho ba sokologelang kwa go bona, ba gope metsi a thuto ya bona ka botlalo.

¹¹ Ba re: “Modimo o ka itse jang, a ruri go na le kitso mo Mogodimodimong?”

¹² Bonang, baikepi ba ntse jalo; ee, ba godisa khumo ya bona ba ntse ba iketlile.

¹³ Ruri, ke lefelafela fa ke ntse ke phepafatsa pelo ya me, ke tlhapa diatla ka bosenamolato.

¹⁴ Gonne ke tlhola ke tshwenngwa ka metlha, ke watlhaiwa moso mongwe le mongwe.

¹⁵ Fa nka bo ke rile, ke tla bolela jaaka bona, nka bo ke diretse losika lwa bana ba gago ka boikanyologo.

¹⁶ Foo ke ne ka akanya gore ke tlhaloganye selo se, ke fitlhela e le matsapa fela,

¹⁷ ga tsamaya ka tsenelela ditsamaisong tse di boitshepo tsa Modimo, ka lemoga bokhutlo jwa bona.

¹⁸ Ruri, o ba baya mo mareleding; o ba leseletsa go wela mo tshenyegong.

¹⁹ Kana ba fetoga theregiso ka tshoganyetso; ba fele, ba nyelele ka poitshego!

²⁰ Wena Morena, o nyatsa setshwano sa bona, fa o tsoga, jaaka toro e nyatsega, fa motho a sena go thanya.

²¹ E rile pelo ya me e ntse e galakegile mme ke tlhabegile mo diphilong,

²² ka bo ke le lesilo, ke sa itse sepe, ke le jaaka phologolo fela fa pele ga gago.

²³ Mme nna ke ntse ke na nao; o ntshwere letsogo le le jang.

²⁴ O tla nkgoga ka kgakololo ya gago, mme morago ga moo o tla nkamogela kwa kgalalelong.

²⁵ Ke na le mang kwa legodimong, fa e se wena? Fa ke na nao, ga ke kgatlhwe ke sepe mo lefatsheng.

²⁶ Le fa nama ya me le pelo ya me di ka nyelela, Modimo ke lefika la pelo ya me, le kabelo ya me ka bosakhutleng.

²⁷ Gonne bona, ba ba ikgaoganyang le wena ba tla latlhega; o nyeletsa botlhe ba ba akafalang ka go ikepa mo go wena.

²⁸ Mme fa e le nna, ke itumela go nna gaufi le Modimo. Wena Morena Modimo o botshabelo jwa me. Ke tla bolela ditiro tsotlhe tsa gago.