Lipesalema 72 - Setswana 1970

Sefela sa tlhomamiso ya kgosi

¹ Pesalome ya ga Salomo. Modimo, naya kgosi melao ya gago; morwa kgosi o mo nee tshiamo ya gago

² gore a atlhole batho ba gago ka tshiamo, le batlalelwi ba gago ka molao.

³ A dithaba di ungwele batho kagiso, le dithabana di ba ungwele tshiamo.

⁴ O tla siamisetsa batlalelwi ba morafe, a pholosa bana ba bahumanegi, a tšhwetlakanya mogateledi.

⁵ O tla phela sebaka se se kana ka letsatsi le tlhabile le ngwedi o ise o phirime go ya tshikatshikeng.

⁶ O tla fologa jaka pula mo pilong, jaaka medupe e e nosang lefatshe.

⁷ Mo malatsing a gagwe tshiamo e tla tlhoga, kagiso e kgolo e tla nna teng go fitlhelela ngwedi o sa tlhole o le yo.

⁸ O tla busa go tswa lewatleng go ya go le lengwe, le go tswa Nokeng go ya mafelelong a lefatshe.

⁹ Ba ba agileng mo dikakeng ba tla khubama fa pele ga gagwe, baba ba gagwe ba tla latswa lerole.

¹⁰ Dikgosi tsa Tharesise le tsa ditlhakenyana di tla tsisa dimpho; dikgosi tsa Šeba le Seba di tla ntsha lekgetho.

¹¹ Dikgosi tsotlhe di tla mo ikobela, ditšhaba tsotlhe di tla mo direla.

¹² Gonne o tla golola mohumanegi yo o goelang thuso le mmogisegi le yo o se nang mothusi.

¹³ O tla utlwela yo mmotlana le motlhoki botlhoko, a pholosa mewa ya bahumanegi.

¹⁴ O tla golola maphelo a bona mo patikegong le mo kgatelelong; madi a bona e tla nna a botlhokwa mo matlhong a gagwe.

¹⁵ A kgosi e phele, mme ba e nee tsa gouta ya Šeba, ba e rapelele ka gale, ba e tshegofatse ka metlha.

¹⁶ A go nne letlotlo la mabele mo lefatsheng, a go sume kwa ditlhoeng tsa dithaba; a leungo la lone le tshwane le Lebanone; a batho ba motse ba rune jaaka morogo wa lefatshe.

¹⁷ A leina la yona le nnele ruri. A leina la yona le tlhoge letsatsi le ntse le le teng; a ditšhaba tsotlhe di tshegofadiwe ka yona, a di e boke di re: Kgosi e tlhogonolo.

¹⁸ A go bokwe Morena, Modimo, Modimo wa Iseraele, o e leng ona fela o o dirang dikgakgamatso.

¹⁹ Mme a leina la ona le le galalelang le bakwe ka bosakhutleng; a lefatshe lotlhe le tlale kgalalelo ya ona, Amen, ee, a go nne jalo!

²⁰ Fano go fela dithapelo tsa ga Dafita, morwa Isai.