Lipesalema 70 - Setswana 1970

Dafita o rapela Modimo gore o mo golole ka bonako

¹ Pesalome ya ga Dafita ya kgopotso mo tshupelong ya tebogo e e kwaletsweng moopedisi.

² Modimo, akofa o nkgolole; Morena, itlhaganele o nthuse.

³ A ba ba batlang go mpolaya ba tlhajwe ke ditlhong, ba sosobane; a ba ba kgatlhwang ke tlalelo ya me ba kate ka morago, ba tlhajwe ke kgala.

⁴ A ba ba reng: “Ahee, ahee!” ba boele kwa morago ka ntlha ya ditlhong tsa bona.

⁵ A botlhe ba ba go batlang ba go itumelele, ba ipele; a ba ba ratang pholoso ya gago ba nne ba bue ba re: “Modimo o mogolo.”

⁶ Mme nna ke motlalelwi, ke mohumanegi; Modimo, a o ko o tle go nna ka bonako. Ke wena thuso ya me le mopholosi wa me; Morena, o se diege.