Lipesalema 7 - Setswana 1970

Ntshiamisetse

¹ Sefela sa ga Dafita se o se opeletseng Morena ka ntlha ya mafoko a ga Khuše wa Mobenyamene.

² Morena, Modimo wa me, ke tshabela kwa go wena; nkgolola mo bapatiking botlhe ba me, o mpholose,

³ e se re gongwe ba nkgagola jaaka tau, ba mphamola go se ope yo o gololang.

⁴ Morena, Modimo wa me, fa ke dirile jalo, fa go na le tshiamololo mo diatleng tsa me,

⁵ fa ene yo o nang a na le kagiso le nna ke mo diretse bosula; fa ke senyeditse ene yo o neng a le moganetsi wa me ka bomo;

⁶ fa go ntse jalo, a mmaba a nteleke, a ntshware, a gatakele bophelo jwa me mo mmung, tlotlo ya me a e latse mo leroleng. Sela.

⁷ Morena, tloga o eme mo bogaleng jwa gago, bololela baganetsi ba me ba ba nkgakaletseng, o tsoge ka ntlha ya me, wena yo o laotseng katlholo.

⁸ A phuthego ya merafe e go dikanyeletse, o boele kwa godimo, o ba okame.

⁹ Morena, o atlhola merafe. Morena, ntshiamisetse ka fa tshiamong ya me le ka fa ke se nang molato ka teng.

¹⁰ Dira gore boikepo jwa baikepi bo khutle! Tlhomamisa mosiami, wena yo o lekang dipelo le diphilo, wena Modimo o o siameng.

¹¹ Thebe ya me e mo Modimong o o thusang ba ba dipelo di boammaaruri.

¹² Modimo ke moatlhodi yo o siameng, e bile ke Modimo o o galefang ka letsatsi le letsatsi.

¹³ Fa motho a sa sokologe, o lootsa tšhaka ya ona, o gagamatsa bora jwa ona, o supa ka jona;

¹⁴ o mmaakanyeditse dibolai tsa loso, o dira metsu ya ona go nna e e tukang.

¹⁵ Bonang, motho yoo o nna moimana ka boikepo, o ithwele tshiamololo, o tsala maaka.

¹⁶ O epile lemena, a le gaba; mme o wetse mo gopong e o e dirileng.

¹⁷ Tshenyo ya gagwe e boela tlhogong ya gagwe, le go thubaka ga gagwe go wela mo phogong ya gagwe.

¹⁸ Ke tla baka Morena ka ntlha ya tshiamo ya gagwe, ke opelela leina la Morena Mogodimodimo.