Lipesalema 69 - Setswana 1970

Mmogisiwa

¹ Pesalome ya ga Dafita e e kwaletsweng moopedisi, e e opelwang ka moopelo wa: “Madutla”.

² Modimo, nthuse! Gonne metsi a gaufi le go mpeta.

³ Ke rorometse mo lerageng le le botengteng, kwa go se nang boemo teng; ke wetse mo madibeng a metsi, morwalela o nkhurumeditse.

⁴ Ke lapisitswe ke go lela ga me, ke sule lentswe; matlho a me a a fela ke ntse ke lebeletse Modimo wa me.

⁵ Ba ba ntlhoileng, go se na molato, ba bantsi go feta dithiri tsa tlhogo ya me. Ba ba ratang go ntshenya, ba e leng baba ba me kwa ntle ga lebaka ba thata, ba re, ke tshwanetse go busa se ke sa se gapang.

⁶ Modimo, wena o itse bosilo jwa me, le melato ya me ga o a e subelwa.

⁷ A bona ba ba go lebeletseng ba se tlhajwe ke ditlhong ka nna, Morena, Modimo wa masomosomo. A bona ba ba go batlang ba se swabe ka nna, Modimo wa Iseraele.

⁸ Gonne ke ka ntlha ya gago ke rweleng nyatsego, ditlhong di bipile sefatlhego sa me.

⁹ Bomorwa-rre ke ba fetogetse moeng, ke yo o sa itsiweng mo baneng ba ga mme.

¹⁰ Gonne go tlhoafalela Ntlo ya gago go njele, le dikgobo tsa bona ba ba go kgobang di nkwetse.

¹¹ Ke ne ka ikutlwisa botlhoko ka go itima dijo, mme ga mphetogela ditlhong.

¹² Ka ikapesa kgetse ya bohutsana, mme ka tswa seane sa tshotlo mo go bona.

¹³ Ba ba ntseng mo kgotleng ba bua ka ga me, le ba ba nwang bojalwa ba nkopela difela.

¹⁴ Mme nna, thapelo ya me ke e lebisitse wena, Morena, ka nako e e go kgatlhang. Modimo, nkutlwe ka fa bogolong jwa bopelotlhomogi jwa gago le ka ntlha ya pholoso ya gago e e ikanyegang.

¹⁵ Ntshwatole mo lerageng gore ke se ka ka rôrômelela ruri; a ke gololwe mo go ba ba ntlhoileng le mo madibeng a metsi.

¹⁶ A morwalela o se nkhurumetse, le bodiba a bo se nkometse; a lemena le se itswale molomo godimo ga me.

¹⁷ Nkutlwe, Morena, gonne bopelotlhomogi jwa gago bo molemo; retologela go nna ka fa bogolong jwa boutlwelo-botlhoko jwa gago.

¹⁸ Mme o se ka wa fitlhela motlhanka wa gago sefatlhego sa gago, gonne ke mo pitlaganong. Akofa o nkutlwe.

¹⁹ Atamela mowa wa me, o o golole; nkgolole ka ntlha ya baba ba me.

²⁰ Wena o itse nyatsego ya me le ditlhong tsa me le go kgojwa ga me; baganetsi ba me o ba itse botlhe.

²¹ Nyatsego e mphatlotse pelo, ka felelwa ke thata; ke tlhologeletswe boutlwelo-botlhoko, mme ga bo yo, le bagomotsi, mme ga ke ba bone.

²² Ba nneile santlhokwe go nna sejo sa me, mme e rile ke nyorilwe, ba nnosa motatsa.

²³ A bojelo jwa bona bo nne segole fa pele ga bona, le mutlwane mo go ba ba sa kgathaleng sepe.

²⁴ A matlho a bona a fifale gore ba se ka ba bona, o theeketse dinôka tsa bona ka gale.

²⁵ Goromeletsa kgakalo ya gago mo go bona, a molelo wa bogale jwa gago o ba tshware.

²⁶ A boago jwa bona bo nne letlotla; a go se age ope mo ditenteng tsa bona.

²⁷ Gonne ba bogisa ena yo wena o mo iteileng; ba godisa botlhoko jwa yo ò mo khutlileng.

²⁸ Oketsa molato wa bona ka molato; a ba se bone tshiamiso ya gago.

²⁹ A ba phimolwe mo bukeng ya bophelo; a ba se kwalwe le basiami.

³⁰ Mme nna ke bogisegile, ke tletse botlhoko. A pholoso ya gago, Modimo, e nkgodise.

³¹ Ke tla tumisa leina la Modimo ka sefela, ke le godisa ka pina e e lebogang.

³² Moo go tla kgatlha Morena bogolo go kgomo, e bong poo e e nang le dinaka le ditlhako tse di maphata.

³³ Ba ba pelonolo ba a go bona, ba itumele. Lona ba lo batlang Modimo, a dipelo tsa lona di phele.

³⁴ Gonne Morena o utlwa bahumanegi; ga a nyatse batshwarwi ba gagwe.

³⁵ A legodimo le lefatshe di mo tumise, le mawatle le tsotlhe tse di nyeulang mo go ona.

³⁶ Gonne Modimo o tla pholosa Sione, o aga metse ya Juta; ba tla aga teng, ba e rua.

³⁷ Boora batlhanka ba ona ba tla rua boswa teng; ba ba ratang leina la ona ba tla aga gona.