Lipesalema 68 - Setswana 1970

Go fenya ga Modimo wa ga Iseraele

¹ Pesalome ya ga Dafita. Sefela se se kwaletsweng moopedisi.

² Fa Modimo o nanoga, baba ba ona ba phatlalala; ba ba o tlhoileng ba tshaba fa pele ga ona.

³ O ba nyeletsa jaaka musi o nyelela; baikepi ba latlhega fa pele ga Modimo jaaka mmotu o gakologa mo molelong.

⁴ Mme basiami ba itumele, ba duduetse fa pele ga Modimo, ba itumele ka boipelo.

⁵ Opelelang Modimo, opelelang leina la ona pako! Ona o o ralalang dipoa tsa bogareganaga, o baakanyetseng tsela! Itumeleng mo Moreneng, lo duduetse fa pele ga gagwe.

⁶ Modimo ke rra-dikhutsana, le moatlholedi wa batlholagadi mo boagong jo bo boitshepo jwa ona.

⁷ Modimo o direla bannanosi legae; o golola bagolegwi, o ba gogele lesegong; mme baganetsi bona ba agile mo lefatsheng la komelelo.

⁸ Modimo, e rile o bolola fa pele ga batho ba gago, ya re o tsamaya mo sekakeng, Sela,

⁹ lefatshe la roroma, magodimo le ona a rotha fa pele ga sefatlhego sa Modimo; Sinai a reketla fa pele ga sefatlhego sa Modimo, Modimo wa Baiseraele.

¹⁰ Modimo, o nesitse pula ya medupe, wa lapolosa naga ya boswa jwa gago e e swabileng.

¹¹ Lesomo la gago le ne la aga mo go yona; o ne wa e baakanyetsa babogisegi ka molemo wa gago, Modimo.

¹² Morena o utlwatsa lefoko; basadi ba ba tlhabang mokgosi wa phenyo ke lesomo le legolo.

¹³ Dikgosi tsa masomosomo di a tshaba, di a tshaba; mme mosadi yo o setseng mo gae o aba thopo.

¹⁴ Fa lo robala kwa merakeng, ga lo bone thopo e e phatsimang jaaka diphuka tsa lephoi tse di manegilweng selefera le diphofa tsa lone tse di manegilweng gouta e tshetlha.

¹⁵ E rile Mong-wa-thata-yotlhe a falatsa dikgosi teng, semathana sa na mo dithabeng tsa Salemone.

¹⁶ Thaba ya Basane ke thaba ya Modimo; thaba ya Basane ke thaba e e ditlhoa.

¹⁷ Lona dithaba tse di ditlhoa, lo lebetseng ka lefufa kwa thabeng e Modimo o e itlhaoletseng go nna boago jwa ona? Ee, Morena o tla aga teng ka bosakhutleng.

¹⁸ Dikoloi tsa Modimo di dikete tse di masome, ke dikete tse di dikete; Morena yo o neng a na nabo kwa Sinai kajeno o mo Felong-ga-Boitshepo.

¹⁹ O tlhatlogetse kwa godimo, wa thopa batshwarwi, wa amogela dineo mo bathong – ee, le mo baganetsing – go nna kgosi o le Morena, Modimo.

²⁰ A go bakwe Morena yo o re belegang ka letsatsi le letsatsi. Modimo ke pholoso ya rona. Sela.

²¹ Modimo ke Modimo wa dithuso mo go rona; Modimo Morena o itse go re falodisa mo losong.

²² Ruri, Modimo o tla tšhwetlaka ditlhogo tsa baba ba ona, e bong logata lo lo moriti lwa yo o ntseng a iphelela mo molatong wa gagwe.

²³ Morena o rile: “Ke tla ba busa kwa Basane, ke tla ba busa mo bodibeng jwa lewatle,

²⁴ gore o phatšhe ka lonao mo mading; diteme tsa dintšwa tsa gago di nne le seabe sa tsona mo babeng.”

²⁵ Ba bona tsamao ya masomo a gago, Modimo, tsamao ya masomo a Modimo wa me, a kgosi ya me, a tsena mo Felong-ga-Boitshepo.

²⁶ Baopedi ba etelela pele, ba latelwa ke baletsi ba dikwadi tsa dithapo, ba tsentswe gare ke makgarebe a a letsang meropa.

²⁷ “Bakang Modimo, Morena, mo diphuthegong, lona ba motswedi wa Iseraele!”

²⁸ Go teng Benyamene yo mmotlana yo o ba busang, dikgosana tsa Juta ka lesomo, dikgosana tsa Sebulone, dikgosana tsa Nafetale.

²⁹ Modimo, laela thata ya gago, o itshupe o le thata, wena Modimo o o re diretseng,

³⁰ o le kwa Tempeleng ya gago o okametse Jerusalema. Dikgosi di tla go tlisetsa dineo.

³¹ Kgalemela sephedi sa motlhaka – motlhape wa dipoo mmogo le merafe ya se-ka-morôle – ba ba ineelang ka dikgolokwe tsa selefera. Falatsa merafe e e natefelwang ke ntwa.

³² Dikgosana di tla tswa kwa Egepeto; lefatshe la Khuše le tla akofa le ntshetsa Modimo mabogo a lone.

³³ Lona magosi a lefatshe, opelelang Modimo; opelelang Morena pako; Sela,

³⁴ ona o o ralalang magodimo a a godimodimo a bogologolo tala; utlwang, o utlwatsa lentswe la ona, lentswe le legolo.

³⁵ Neelang Modimo thata, borena jwa ona bo okame Iseraele le thata ya ona e mo marung.

³⁶ Modimo o boitshega go tswa mafelong a ona a a boitshepo. Modimo wa Iseraele ke ona o o nayang morafe thata le nonofo. A Modimo o bakwe.