Lipesalema 65 - Setswana 1970

Sefela sa go baka molemo wa Modimo

¹ Pesalome ya ga Dafita. Sefela se se kwaletsweng moopedisi.

² Modimo, o tshwanetswe ke sefela sa pako mo Sione, maikano o tla a direlwa.

³ Wena yo o utlwang thapelo, batho botlhe ba tla tla go wena.

⁴ Dilo tse di molato di mpaletse. Ditlolo tsa rona wena o tla di ruanya.

⁵ Go sego ena yo ò mo itlhaolelang, ò mo ikatametsa, gore a age mo malapeng a gago. Re tla kgora molemo wa Ntlo ya gago, le boitshepo jwa Tempele ya gago.

⁶ O re araba ka tshiamo ka dilo tse di boitshegang, wena Modimo wa pholoso ya rona o o ikanngwang ke dikhutlo tsotlhe tsa lefatshe le dintshi tse di kgakala.

⁷ O thatafatsa dithaba ka thata ya gago, o itlamile ka nonofo.

⁸ O didimatsa kgwaso ya mawatle, kgwaso ya makhubu a ona, le khuduo ya merafe,

⁹ gore ba ba agileng kwa dikhutlong tsa lefatshe ba boife ditshupo tsa gago; mafatshe a botlhabatsatsi le bophirimatsatsi o a tlatsa tuduetso.

¹⁰ O lekotse lefatshe, wa le fa letlotlo, o le humisa thata; noka ya Modimo e tletse metsi. O ba baakanyetsa mabele; gonne o e baakanya jalo.

¹¹ O nosa ditemo tsa lone, o thuba makwete a lone, o le kolobisa ka medupe, o tshegofatsa go tlhoga ga dijwalo tsa lone.

¹² O rwesa ngwaga ka molemo wa gago, ditselana tsa gago di rotha monono.

¹³ Mafulo a naga a a tshutshuma; dithota di itlamile ka tuduetso.

¹⁴ Mafulo a apesitswe ka matsomane; mekgatsha e khurumeditswe ka mabele; di duduetsa tsotlhe, di a opela.