Lipesalema 64 - Setswana 1970

Petso ya baba ba mosiami

¹ Pesalome ya ga Dafita e e kwaletsweng moopedisi.

² Modimo, utlwa lentswe la me, fa ke lela; boloka bophelo jwa me, fa ke tshosiwa ke mmaba.

³ Mphitlhe ke fitlhegele maikaelelo a basulatsi le pheretlhego ya badiratshiamololo;

⁴ ba ba looditseng diteme tsa bona jaaka ditšhaka ba supile ka metsu ya bona, e bong mafoko a a galakang,

⁵ go hula mosiami ba mo laletse, ba mo hula ka tshoganyetso, ba sa boife.

⁶ Ba ikaeletse go dirafatsa maano a a bosula, ba bolela go thaisa ka mitlwane e e subilweng ba re: “Go tla bona mang?”

⁷ Ba akanya boikepo ba re: “Re sweditse, re logile maano a mantle.” Mogopolo wa motho o botengteng, le pelo ke lengôpe.

⁸ Mme Modimo o tla ba hula ka motsu; dipetso tsa bona di tla tla ka tshoganyetso.

⁹ Ba tla digwa ke diteme tsa bona; botlhe ba ba ba lebileng ba thukhutha ditlhogo.

¹⁰ Mme batho botlhe ba tla boifa, ba bolela tiro ya Modimo, ba tlhokomela se o se dirang.

¹¹ Mosiami o tla itumela mo Moreneng, a batla botshabelo fa go ena; mme botlhe ba ba dipelo di tlhamaletseng ba tla itumisa ka Morena.