Lipesalema 63 - Setswana 1970

Dafita o tlhologeletswe Modimo

¹ Pesalome ya ga Dafita, a le mo sekakeng sa Juta.

² Modimo, o Modimo wa me, ke batla wena; mowa wa me o go nyoretswe, nama ya me e go tlhologeletswe mo lefatsheng la komelelo, le le nyorilweng, le le se nang metsi.

³ Ke ne ke go lebile kwa Felong-ga-Boitshepo ka maikutlo a a ntseng jalo, go bona thata ya gago le kgalalelo ya gago.

⁴ Gonne bopelotlhomogi jwa gago bo molemo go gaisa bophelo. Molomo wa me o tla go baka.

⁵ Ke tla go tumisa jalo mo botshelong jotlhe jwa me, ke tsholetsa mabogo mo leineng la gago.

⁶ Mowa wa me o tla kgora jaaka ka moko le mafura; molomo wa me o tla baka ka go duduetsa,

⁷ fa ke go gopola mo bolaong jwa me; ke akanya ka ga gago ka dinako tsa tebelelo ya bosigo.

⁸ Gonne o ne o le thuso ya me; ke tla duduetsa mo moriting wa diphuka tsa gago.

⁹ Mowa wa me o go setse morago, o go kgomaretse; letsogo le le jang la gago le ntshegeditse.

¹⁰ Mme bona ba ba ratang go nkisa tshenyegong ke bona ba ba tla fitlhang mo mafelong a a kwa tlase ga lefatshe.

¹¹ Ba tla neelwa mo thateng ya tšhaka; ba tla nna seabe sa diphokojwe.

¹² Mme kgosi e tla itumela mo Modimong. Mongwe le mongwe yo o ikanang ka ona o tla belafala; gonne melomo ya ba ba buang maaka e tla thijwa.