Lipesalema 62 - Setswana 1970

Boikhutso mo Modimong

¹ Pesalome ya ga Dafita e e kwaletsweng moopedisi, e e opelwang ka moopelo wa ga Jeduthune.

² Mowa wa me o didimaletse Modimo fela; thuso ya me e tswa mo go ona.

³ Ke ona fela lefika la me le thuso ya me le kago ya me ya phemelo; ga nkitla ke tshikinyega thata.

⁴ Lo tla kgwelogela motho goleele go le kae, lo rata go mmolaya lotlhe, etswe a tshwana le lobota lo lo sekameng le lorako lo lo batlileng go wa?

⁵ Ba akantse fela go mo diga mo bogolong jwa gagwe; ba natefelwa ke maaka; ka molomo ba a tshegofatsa, mme mo teng ga bona gona ba hutsa. Sela.

⁶ Didimalela Modimo fela, mowa wa me; gonne se ke se lebeletseng se tswa mo go ona.

⁷ Kana ke ona lefika la me le thuso ya me; ke kago ya me ya phemelo, ga nkitla ke tshikinyega.

⁸ Pholoso ya me e mo Modimong le tlotlo ya me; lefika le le thata la me le mo Modimong, le botshabelo jwa me.

⁹ Ikanyeng ona ka gale, lona batho! Tshololang dipelo tsa lona fa pele ga ona! Modimo ke botshabelo jwa rona. Sela.

¹⁰ Ruri, ba babotlana ke ba lefelafela, ba bagolo ke baaki; mo selekanyong ba a tsholetsega, botlhe mmogo ba botlhofo bogolo go pudulo e le nngwe fela ya mowa.

¹¹ Lo se ka lwa ikanya patiko; lo se ka lwa solofelela lefela mo thopong. Fa khumo e ata, lo se ka lwa e kgomarela ka dipelo.

¹² Modimo o buile gangwe, nna ke utlwile gabedi gore thata ke ya Modimo.

¹³ Le bopelotlhomogi ke jwa gago, Morena; gonne o duela mongwe le mongwe ka fa tirong ya gagwe.