Lipesalema 61 - Setswana 1970

Kgosi e a tshaba

¹ Pesalome ya ga Dafita e e kwaletsweng moopedisi, e e opedisiwang ka kwadi ya dithapo.

² Modimo, utlwa mekokotlelo ya me, o ele thapelo ya me tlhoko.

³ E a re fa pelo ya me e feletswe, ke goele kwa go wena ke le kwa bokhutlong jwa lefatshe; nkgogele kwa godimo ga lefika le legolo la pholoso, nna ke a palelwa.

⁴ Gonne o diregile botshabelo jwa me, le turio e e thata ya phemelo kgatlhanong le mmaba.

⁵ Ke rata go nna ka gale mo tenteng ya gago le go tshabela mo phemelong ya diphuka tsa gago. Sela.

⁶ Gonne wena, Modimo, o utlwile maikano a me; ba ba boifang leina la gago o ba neile boswa.

⁷ A ko o oketse malatsi a kgosi ka malatsi; a dinyaga tsa yona di nne go ya tshikatshikeng.

⁸ A e nne mo sedulong sa bogosi fa pele ga Modimo ka bosakhutleng. Dira gore bopelotlhomogi le boammaaruri di e sireletse.

⁹ Foo ke tla opelela leina la gago ka go sa feleng, ke dirafatsa maikano a me ka letsatsi lengwe le lengwe.