Lipesalema 60 - Setswana 1970

Thapelo ya ga Dafita, a sena go fenngwa

¹ Loboko lwa ga Dafita lwa go ruta lo lo kwaletsweng moopedisi, lo lo opelwang ka moopelo wa: “Ledutla la tshupo”.

² Lo kwadilwe jale fa a tlhabana le Basiria ba Mesopotamia le Basiria ba Soba, fa Joabe a boa, a fenya Baetomo ba le 12 000 mo mokgatsheng wa letswai.

³ Modimo, o re latlhile, o re faladitse; o ne o gaketse, re agise gape.

⁴ O roromisitse lefatshe, wa le fatoganya. Fodisa thubego ya lone, gonne le a theekela.

⁵ O bontshitse batho ba gago dilo tse di thata, wa re nosa weine e e theekedisang.

⁶ Ba ba go boifang o ba neile sefoka gore ba falole mo boreng. Sela.

⁷ Thusa ka letsogo le le jang la gago, o re utlwe, gore baratiwa ba gago ba gololege.

⁸ Modimo o buile mo Felong-ga-Boitshepo ga ona wa re: “Ke tla ipela, ke tla kgaoganya Šegeme, ke lekanya mokgatsha wa Sukothe.

⁹ Gileate ke wa me le Manase ke wa me; Eferaime ke phemelo ya tlhogo ya me, Juta ke thobane ya me ya bogosi.

¹⁰ Moabe ke mogopo wa me wa go tlhapela. Setlhako sa me ke se latlhela mo go Etomo; ntudueletsa, wena Felesita.”

¹¹ Ke mang yo o tla nkisang kwa motseng o o thata? Ke mang yo o tla nkgogelang kwa Etomo?

¹² A ga se wena, Modimo, o o re latlhileng? Ee, Modimo, ga o bolole le mephato ya rona.

¹³ Re direle thuso ya go phologa mo mmabeng; gonne thuso ya batho ga se ya sepe.

¹⁴ Ka Modimo re tla dira ditiro tsa bonatla, mme ona o tla gataka baba ba rona.