Lipesalema 6 - Setswana 1970

Thapelo ya boikwatlhao mo pitlaganong e kgolo

¹ Pesalome ya ga Dafita e e kwaletsweng moopedisi; e opedisiwe ka kwadi ya dithapo, e na le kodu ya moporo.

² Morena, se mpetse ka bogale jwa gago, se nkwatlhae o gaketse.

³ Morena, intshwarele: gonne ke swabile. Morena, mphodise; gonne ke remegile marapo,

⁴ mowa wa me le ona o reregile thata; mme wena, Morena, o tla nna goleele go le kae?

⁵ Boa Morena, o pholose botshelo jwa me, o nthuse ka ntlha ya bopelotlhomogi jwa gago.

⁶ Gonne mo losong ga o gopolwe; ke mang yo o tla go lebogang kwa felong ga baswi?

⁷ Ke lapile ka go fegelwa ga me, ke edisa bolao jwa me bosigo bongwe le bongwe, ke kolobisa phate ya me ka dikeledi tsa me.

⁸ Leitlho la me le fifaditswe ke bohutsana, le onetse ka ntlha ya baganetsi botlhe ba me.

⁹ Ntlogeleng lona lotlhe badiratshiamololo; gonne Morena o utlwile lentswe la selelo sa me.

¹⁰ Morena o utlwile mekokotlelo ya me, Morena o amogela thapelo ya me.

¹¹ Baba ba me botlhe ba tla tlhajwa ke ditlhong, ba tshoga thata; ba tla boela kwa morago, ba tlhajwa ke ditlhong ka tshoganyetso.