Lipesalema 59 - Setswana 1970

Thuso mo dinokwaneng tse di ikgantshang

¹ Loboko lwa ga Dafita lo lo kwaletsweng moopedisi, lo lo opelwang ka moopelo wa: “O se ka wa senya”, lo kwadilwe jale fa Saule a roma go lalela fa ntlong go bolaya Dafita.

² Modimo wa me, nnamolele mo babeng ba me, o ntshireletse mo go ba ba ntsogelang.

³ Nnamolele mo go ba ba dirang bosula, o nthuse mo banneng ba ba tshololang madi.

⁴ Gonne bona, ba laletse botshelo jwa me, diganka di a ntlhasela, ke se kgopo, ke sa leofa, Morena.

⁵ Ba a taboga, ba a ipaakanya, ke se na molato ope. Tsoga go nkgatlhantsha, o bone.

⁶ Ee, Morena, Modimo wa masomosomo, wena Modimo wa Iseraele, thanya o betse baheitane botlhe, mme o se ka wa itshwarela ope wa baikepi ba boikanyologo. Sela.

⁷ Ba nne ba boe maitsiboa, ba lele jaaka dintšwa, ba dikologe mo motseng.

⁸ Bona, ba nyefola ka melomo; ditšhaka di mo melomong ya bona; gonne ba re: “Ke mang yo o utlwang?”

⁹ Mme wena, Morena, o a ba tshega, o sotla baheitane botlhe.

¹⁰ Wena thata ya ka, ke tla go ela tlhoko; gonne wena Modimo o phemelo ya ka.

¹¹ Modimo wa me o tla nkgatlhantsha ka bopelotlhomogi jwa ona; Modimo o tla ntebisa baba ba me ka boitumelo.

¹² O se ka wa ba bolaela ruri, gore batho ba me ba tle ba se ka ba lebala. Ba kgarakgatshe ka thata ya gago, o ba dige, wena Morena, thebe ya rona.

¹³ Boleo jwa bona ke lefoko la melomo ya bona. A ba tshwarwe mo boikgantshong jwa bona, le ka ntlha ya dithogakano le dikako tse ba di buang.

¹⁴ Ba nyeletse ka kgakalo, ba nyeletse gore ba se ka ba tlhola ba le yo, mme ba lemoge gore Modimo o busa mo go Jakobe go ya kwa dikhutlong tsa lefatshe. Sela.

¹⁵ Ba nne ba boe maitsiboa, ba lele jaaka dintšwa, ba dikologe mo motseng.

¹⁶ Ba kgarakgatshegela dijo; fa ba sa kgore, ba a ngongorega.

¹⁷ Mme nna ke tla opela ka ga thata ya gago, ke tla dudueletsa bopelotlhomogi jwa gago mo mosong mongwe le mongwe; gonne o ne o le phemelo ya me le botshabelo jwa me ka letsatsi la tlalelo.

¹⁸ Wena thata ya me, ke tla go opelela; gonne wena Modimo o phemelo ya me, Modimo o o bopelotlhomogi wa me.