Lipesalema 57 - Setswana 1970

Pelo ya me e a itapolosa

¹ Loboko lwa ga Dafita lo lo kwaletsweng moopedisi lo lo opelwang ka moopelo wa: “O se ka wa senya”, jale fa a tshaba Saule, a tshabela kwa logageng.

² Nkutlwele botlhoko, Modimo, o nkutlwele botlhoko; gonne mowa wa me o batlile botshabelo mo go wena; ke tla batla botshabelo mo moriting wa diphuka tsa gago, go ya madimabe a be a fete.

³ Ke bitsa Modimo, Mogodimodimo, Modimo o o nkhutlisetsang dilo tsotlhe.

⁴ O tla roma o le kwa legodimong, o mpholosa, fa yo o mpeteletseng a ntshotla. Sela. Modimo o tla roma bopelotlhomogi jwa ona le boammaaruri jwa ona.

⁵ Ke na le go lala mo gare ga ditau, e bong batho ba ba tukang bogale, ba meno a bona e leng marumo le metsu, ba diteme tsa bona e leng ditšhaka tse di bogale.

⁶ Modimo, itsholeletse godimo ga magodimo; a kgalalelo ya gago e okame lefatshe lotlhe.

⁷ Ba thaisitse dikgato tsa me ka letloa, ba obile mowa wa me; ba epile lemena fa pele ga me, ba wetse mo go lone. Sela.

⁸ Pelo ya me e gomotsegile, Modimo, pelo ya me e gomotsegile. Ke tla opela, ke letsa.

⁹ Thanya, tlotlo ya me! Tsogang, harepa le kitara! Ke rata go tsosa mahube a moso.

¹⁰ Ke tla go baka mo merafeng, Morena, ke go opelela mo ditšhabeng.

¹¹ Gonne bopelontle jwa gago bo bogolo, bo fitlha kwa magodimong, le boammaaruri jwa gago bo fitlha kwa marung.

¹² Modimo, itsholeletse godimo ga magodimo, a kgalalelo ya gago e okame lefatshe lotlhe.