Lipesalema 56 - Setswana 1970

Kgomotso ya motshabi

¹ Loboko lwa ga Dafita lo lo kwaletsweng moopedisi, lo lo opelwang ka moopelo wa: “Leeba la maoka a a kgakala”, lo kwadilwe jale fa Bafelesita ba ne ba mo tshwere kwa Gathe.

² Modimo, intshwarele; gonne motho o mpeteletse; motlhabani o tlhola a mpitlagantse.

³ Ba ba ntaletseng ba tlhola ba batla go mmetsa; gonne ba bantsi ba ba lwang le nna ka boikgodiso.

⁴ Motlhang ke boifang, ke tla ikanya wena.

⁵ Ka thuso ya Modimo ke tla baka lefoko la ona. Ke ikanya Modimo ke sa boife; kana batho ba ka ntirang?

⁶ Ba tlhola ba sokamisa mafoko a me; megopolo yotlhe ya bona e lebile go ntirela bosula.

⁷ Ba ikgobokanya, ba a lalela, ba etse direthe tsa me tlhoko, fela jaaka ba ba laletseng botshelo jwa me.

⁸ A ba ka falola e le baikepi? Modimo, diga merafe ka bogale.

⁹ Dikgarakgatshego tsa me o di badile, le dikeledi tsa me o di tsentse mo modutwaneng wa gago; kana di mo lokwalong lwa gago.

¹⁰ Foo baba ba me ba tla boela kwa morago, motlhang ke tla bitsang. Se ke se itseng ke go re, Modimo o mo ntlheng ya me.

¹¹ Ke rata go boka lefoko la Modimo; ke rata go tumisa lefoko la Morena.

¹² Ke ikanya Modimo ke sa boife. Kana motho a ka ntirang?

¹³ Modimo, ke go ikanetse maikano; ke tla a go dirafaletsa ka ditlhabelo tsa tebogo.

¹⁴ Gonne o golotse bophelo jwa me mo losong le dinao tsa me mo go kgotšweng gore ke tsamae fa pele ga Modimo mo leseding la bophelo.