Lipesalema 55 - Setswana 1970

Go tshabela kwa sekakeng

¹ Sefela sa thuto sa ga Dafita se se kwaletsweng moopedisi, se opedisiwe ka kwadi ya dithapo.

² Modimo, reetsa thapelo ya me, mme o se ka wa iphitlhela mekokotlelo ya me.

³ Ntlhokomele o nkarabe. Ke kgarakgatshega ka tshwenyego ya me, ke ntse ke duma

⁴ ka ntlha ya tlhodio ya mmaba, ka ntlha ya kgatelelo ya moikepi; gonne ba ntigela mo tatlhegong, ba lwa le nna ba gaketse.

⁵ Pelo ya me e hutagana mo teng ga me, dipoitshego tsa loso di nkwetse.

⁶ Poifo le thoromo di a ntshwara, letshogo le nkhurumeditse.

⁷ Mme ke ne ka re: “E kete nka bo ke na le diphuka jaaka lephoi, ke ne ke tla fofa, ke ya go nna go sele.

⁸ Bonang, ke ne ke tla tshabela kwa kgakala, ke nna teng kwa sekakeng. Sela.

⁹ Ke ne ke tla akofa ke batla botshabelo; ke tshaba phefo ya matsubutsubu, ke tshaba ledimo.”

¹⁰ Morena, raraanya dipuo tsa bona, o di tlhakatlhakanye; gonne ke bona tshiamololo le kganetsanyo mo motseng.

¹¹ Bosigo le motshegare ba o potologa ba le mo dipoteng tsa ona, mme mo teng ga ona go tletse boikepo le tapisego.

¹² Tshiamololo e mo go ona; mme patiko le tsietso ga di tloge mo patlelong ya ona.

¹³ Kana ga se mmaba yo o ntshotlang, – nka bo ke itshoka – ga se yo o ntlhoileng, yo o inkgodisetsang, nka bo ke mo iphitlhela.

¹⁴ Mme ke wena, motho-ka-nna, tsala ya ka le moikanngwi wa ka,

¹⁵ ba re neng re utlwana sentle, re ya kwa Ntlong ya Modimo le masomosomo a batho.

¹⁶ A ba welwe ke loso; a ba fologele kwa felong ga baswi ba ntse ba tshela; gonne bosula bo mo maagong a bona, mo teng ga bona.

¹⁷ Mme nna ke bitsa Modimo, mme Morena o tla nthusa.

¹⁸ Ke tla lela, ke fegelwa maitsiboa le mo mosong le motshegare, mme o tla utlwa lentswe la me.

¹⁹ O golola mowa wa me ka kagiso mo tlhabanong e e ntlhasetseng; gonne ba ntikile ka bontsi.

²⁰ Modimo o o sa leng o nna bogologolo mo sedulong sa bogosi o tla utlwa, o ba kokobetsa, ka go se na tlhabologo mo go bona, ba sa boife Modimo. Sela.

²¹ Mme o ntsheditse ba neng ba agisantse nae diatla, a senya kgolagano ya gagwe.

²² Mafoko a molomo wa gagwe a borethe jaaka sereledi, pelo ya gagwe ke ntwa; dipolelo tsa gagwe di boleta go gaisa lookwane; etswe e le ditšhaka tse di somotsweng.

²³ Latlhela tshwenyego ya gago mo Moreneng, mme o tla go tlamela; ga a kitla a leseletsa mosiami ka gope go theekela.

²⁴ Mme Modimo, wena o tla ba digela mo bodibeng jwa tshenyego. Banna ba polao le tsietso ga ba ne ba fitlha fa gare ga dinyaga tsa bona. Mme nna ke ikanya wena.